Den neie Koalitiounsaccord wier e Katalog vun Eenzelmesuren, ee Kaartenhaus aus eenzele Kapitelen, dat beim éischte Wandstouss géif riskéieren ëmzefalen, esou d'Oppositiounsleaderin Martine Hansen de Moien um Krautmaart. "Et ass een Zweckofkommes fir eng Zweckkoalitioun."
Weider Onkloerheet iwwer finanziellen Impakt vu Koalitiounsaccord
Anescht wéi am Regierungsvertrag vun 2013 stéing an der Versioun vun 2018 de Begrëff "gemeinsame Projet" net méi dran, huet d'CSV-Fraktiounscheffin festgestallt. Am Vertrag stéingen och keng kloer Ziler a Saache Croissance. Dobäi wier awer kloer, datt Lëtzebuerg an den nächste Joren "ganz zolitte Wuesstem" bräicht, "fir dësen Dräier-Katalog ze stemmen".
Den DP-Fraktiounspresident huet de Koalitiounsaccord verdeedegt. Et wier een ambitiéise Projet vun der Gerechtegkeet an der Nohaltegkeet vun der Gesellschaft. Den Eugène Berger begréisst och, datt d'CSV-Fraktiounspresidentin Martine Hansen déi meescht Moossnamen am Koalitiounsaccord mat ënnerstëtzt. Hir Kritik, datt de Programm d'Staatsfinanze géife strapazéieren, léisst den Eugène Berger net stoen. Och den Alex Bodry, LSAP-Fraktiounspresident, huet ënnerstrach, datt d'Dräierkoalitioun d'Staatsschold am Grëff huet. Iwwerdeems wieren d'Pensiounsreserven héich. Hien huet awer zouginn, datt dat mat Hëllef vun der gudder konjunktureller Situatioun méiglech war.
Zu enger weiderer Kritik vun der CSV, datt de Koalitiounsprogramm net chiffréiert gouf, sot den Alex Bodry, datt d'CSV deen deierste Wahlprogramm hat. Iwwerdeems hätt nach ni eng Koalitioun ee Programm chiffréiert.
"Dramatesch Situatiounen am Logement"
D'Martine Hansen huet e bessere Logements-Bilan wéi an der leschter Regierung verlaangt, mat méi Offer an engem méi séiere Bauen. "Een normal verdéngende Mënsch, eng normal verdéngend Famill ka sech kaum nach een Eegenheem hei zu Lëtzebuerg leeschten: an dat ass dramatesch."
De Mobilitéitsproblem am Land géif een net iwwer eng Gratuitéit vum ëffentlechen Transport léisen, esou d'Martine Hansen an hirer Ried. Bus, Zuch an Tram misste méi attraktiv gemaach ginn. Kritesch ass d'CSV-Fraktiounscheffin bei de Regierungspläng fir Changementer bei der Kilometerpauschal. Virun allem Leit, déi am ländleche Raum wunnen, géifen doduerch gestrooft ginn, esou d'Martine Hansen. "Déi ginn u sech dräi Mol bestrooft: si profitéieren net vun der Gratuitéit, si kréien d'Kilometerpauschal gekierzt a si mussen herno nach eng Kéier extra op der Pompel berappen."
Fragil Regierungsmajoritéit an der Chamber
An hirer Ried huet d'Martine Hansen och d'Zesummesetzung vun der Regierung kritiséiert. D'Tatsaach, datt d'Dräierkoalitioun an der Chamber nëmmen 31 Sëtz huet, géif bedeiten, datt all Majoritéits-Deputéierten e Veto-Recht hätt. Der CSV-Fraktiounscheffin no géif et dowéinst eng "Wackelgefor" vun der Majoritéit ginn, déi zu engem absolute Stëllstand kéint féieren.
"Gambia" versus "Regierung"
A bei der Ried vun der neier CSV-Fraktiounscheffin huet de Minister François Bausch de Moien un d'Martine Hansen appelléiert, d'Dräier-Koalitioun vun DP, LSAP an déi gréng net méi "Gambia" ze nennen. "Mir sinn eng demokratesch gewielte Regierung", huet de grénge Minister ënnerstrach.