Lëtzebuerger Presselandschaft Mediahuis keeft Saint-Paul
De Bistum verkeeft déi gréisste Lëtzebuerger Dageszeitung Lëtzebuerger Wort, déi an auslännesch Hänn iwwergeet. D'Editiounshaus Saint-Paul, dat nieft dem Wort och den Télécran an déi englesch-sproocheg Luxembourg Times erausgëtt, huet haut matgedeelt, datt de Grupp vum belsche Medienkonzern Mediahuis NV opkaf gëtt.
Bis elo war de Grupp Lafayette SA., déi de Patrimoine vum Bistum geréiert, Referenzaktionär vu Saint-Paul. Lafayette géif am Géigenzuch eng Minoritéitsparticipatioun u Mediahuis huelen. Zu deem Grupp gehéieren Titele wéi déi belsch Zeitung De Standaard, déi hollännesch Zeitungen De Telegraaf an NRC Handelsblad, mee och den Irish Independent an eng Rëtsch Radio-Senderen a regional Tëleestatiounen.
De François Pauly géif President vum Verwaltungsrot bleiwen, heescht et am Communiqué. Och den Direkter Paul Peckels an d'Chefredaktioun aus Roland Arens, Claude Feyereisen a Marc Schlammes sollen hir Poste behalen. Duerch d'Kooperatioun mat den anere Medien aus dem Grupp soll déi digital Transformatioun bei Saint-Paul erliichtert ginn, heescht et am Schreiwes. D'Ligne éditoriale vum Wort géif respektéiert ginn an d'Medie vum Grupp Saint-Paul géife weiderhi reliéis Sujeten an d'Kommunikatioun vun der Kierch couvréieren.
Méi zum Thema
Exklusiv
Neien Organigramm beim Lëtzebuerger Wort
Virun engem Mount gouf de Jean-Lou Siweck als Chefredakter vum Lëtzebuerger Wort ofgesat. Elo ginn et eisen Informatiounen no weider Ännerungen an de Redaktioune vun der gréisster Dageszeitung.
Meenung
Trennung vu Kierch an CSV
Vill ass an der Lescht iwwert d'Trennung vu Kierch an Staat diskutéiert ginn. Fir kritesch Chrëschte war déi Trennung längst iwwerfälleg. Mä wéi ass et mat der Trennung vu Kierch an CSV?
Kommentar
Schlecht fir de Journalismus zu Lëtzebuerg
De Verwaltungsrot vu Saint-Paul Lëtzebuerg huet d'Wort-Chefredaktioun ausgewiesselt. An d'Kredibilitéit vun der gréisster Dageszeitung zerstéiert, mengt de Jean-Claude Franck.
Wort-Redaktioun wëllt Stellung huelen
No der Annonce, datt de Chefredakter vum Lëtzebuerger Wort d'Dageszeitung verléisst, sicht de Verwaltungsrot no enger interner Léisung. D'Redaktioun wëllt muer Stellung zur aktueller Situatioun huelen.
Bistum orientéiert d'Wort nees méi no riets
De Jean-Lou Siweck hält Enn September als Chefredakter vum Lëtzebuerger Wort op. Hien ass net averstane mat der neier Linn vum President Luc Frieden an dem Bistum, Proprietär vum Groupe Saint-Paul.
