"Et ass gutt gelaf", dat ass de Constat vun der Jessica Lopes vun der ASTI. Eng 95 Prozent vun de Leit, déi e Rendezvous haten, wieren och effektiv komm an hu sech impfe gelooss.
"D'Leit waren extrem frou", erzielt d'Jessica Lopes. Schonn am Januar a Februar hätt hir Organisatioun Demandë gehat, wéi Sans-papieren sech och kéinten impfe loossen.
D'Explikatioun dofir gesäit d'Jessica Lopes doran, datt déi Leit dacks ënner prekären Ëmstänn liewen, hier Liewenskonditioune schwiereg sinn, si keng Krankekeess hunn an och keen Accès zum Large-Scale-Testing haten. "Dofir koum et zu der Pro-Impfung Positioun", seet d'Jessica Lopes.
D'ASTI an de CLAE hunn de Kontakt gemaach
D'Leit, déi keng Openthaltsgeneemegung hunn, liewe verstoppt - si hunn keng Adress a keng Matricule. "Iwwer eis konnt den Accès gemaach ginn", seet d'Jessica Lopes: si hätten d'Lëschte mat den Impfdemandë geréiert.
Fir déi Concernéiert wieren du Matriculle generéiert ginn, wat awer keng wierklech Matriculle waren. Si goufe just fir d'Impfung genotzt. "Mir hunn de Leit awer och missen eng Kopie vum Pass froen - dofir huet Vertraue missen opgebaut ginn", erzielt d'Mataarbechterin vun der ASTI.
D'Leit hätten Angscht gehat, datt hir Informatiounen iergendwa géifen an der Direction de l'immigration landen. "Mir hunn awer d'Versprieche vun der Gesondheetsministerin, datt dat net geschitt", esou d'Jessica Lopes.
Am ganze konnten iwwregens eng 120 Leit iwwer déi Aktioun geimpft ginn, mam Vaccin vu BioNTech/Pfizer oder deem vun Johnson&Johnson.
