Chamberwahlen 2018 "Mir maachen eng konkret Erneierung"
Den Alex Bodry bleift just nach ee Joer Fraktiounschef, huet awer fest wëlles säi Mandat als Deputéierten duerno bis un d'Enn vun der Legislaturperiod ze behalen. Hie wéilt sech awer och an der kruzialer Phas vun der Verfassungsreform aus deene méi haarden a polemeschen Ausenanersetzungen erauszehalen, déi een als Fraktiounschef noutgedronge féiere muss.
De Poste vum Fraktiounschef wier nämlech schwéier kompatibel mat der Roll, déi hie wéilt spillen, fir déi reforméiert Verfassung an engem méiglechst breede Konsens duerchzekréien. Hie wéilt déi néideg Distanz zum politeschen Alldag hunn, esou den LSAP-Politiker.
Den Alex Bodry, deen als President vun der Verfassungskommissioun an der Chamber confirméiert gouf, wäert eng Haaptroll spillen an der Informatiouns- an Diskussiounscampagne am Virfeld vum Referendum.
Personell Erneierung: "Mir maache se direkt"
Déi personell Erneierung vun der Partei op de wichtegste Positioune wier ee Grond, firwat hien decidéiert hätt sech den 1. Januar 2020 als Fraktiounspresident zeréckzezéien. Den Député-Maire vu Suessem, Georges Engel, soll de Posten dann iwwerhuelen. Den Alex Bodry ënnersträicht, datt d'LSAP eng Erneierung um ganze Plang bräicht, mee datt fir hien d'Erneierung vun den Iddien déi wichtegst wier. "Mee Iddie ginn no baussen duergestallt a vertrueden duerch eenzel Persounen."
Nodeems d'LSAP een Drëttel vun der Regierungsequipe erneiert huet, an de Generalsekretär Yves Cruchten an de President Claude Haagen gesot hunn, datt si net méi wäerte fir hir Poste kandidéieren, ass et fir den Alex Bodry "eng Selbstverständlechkeet", datt hien net méi déi ganz Mandatsperiod wéilt Fraktiounschef bleiwen. "Aner Parteie schwätze mol vun Erneierung, mir maache se direkt", esou den Alex Bodry. Den 1. Januar 2020 gëtt de Georges Engel, den Député-Maire vu Suessem, neie President vun der LSAP-Fraktioun an der Chamber.
An der Mediathéik:
LauschterenMéi zum Thema
Analys
Ugespaante Situatioun bei der LSAP, Erneierung bei der CSV
D'Regierung steet, d'CSV ass am Gaange sech ze erneieren an d'Chamber ass nees komplett. Wéi si verschidden Entwécklungen ze analyséieren? Erklärunge vum 100,7-Chefredakter Jean-Claude Franck.
LSAP-Gremie fir Regierungsbedeelegung
D'LSAP soll an d'Regierung goen. Dat gouf den Dënschdeg am Centre Barblé zu Stroossen decidéiert. Kritesch Téin koume wéi erwaart vun de Vertrieder vun de Jongsozialisten.
"LSAP-Parteispëtzt muss Konsequenzen zéien"
Den LSAP-Parteipresident an den LSAP-Generalsekretär missten aus dem Wahlechec vun de Sozialiste Konsequenzen zéien. Dat fuerdert de Sammy Wagner, den LSAP-Schäffe vu Stengefort.
"LSAP muss sech Gedanke maachen"
Den OGBL-President, André Roeltgen, ass net iwwerrascht iwwer d'Resultater vun de rezente Sondagen. D'LSAP misst iwwer hir sozialpolitesch Ausriichtung nodenken.
