Fir de neie Logo vu regionale Produiten ze stäerken, hätt sech d'Associatioun vun de Lëtzebuerger Jongbaueren a Jongwënzer gewënscht, datt en zertifiéierte Produit eréischt da mat engem Logo gekennzeechent gëtt, wann en eng méi héisch Unzuel u Qualitéitskrittären erfëllt. Den zoustännege President Christian Hahn nennt als Beispiller d'Ëmwelt an d'Déierewuel, et wéilt een d'Lat nach méi héich leeën, och wann et qualitativ héichwäerteg Produite wieren.
A Punkto Regionalitéit hätt sech d'Associatioun e méi begrenzte Radius gewënscht. Trotzdeem hätt sech de Projet vum Landwirtschaftsministère schonns ëm villes verbessert a stellt aktuell eng Plus-value fir de Secteur duer, mengt de Christian Hahn.
D'Associatioun vun de Lëtzebuerger Jongbaueren a Jongwënzer ass der Meenung, datt et wichteg wier de Projet elo op den Instanzewee ze bréngen. Et wier besser suboptimal unzefänken, wéi guer net ze unzefänken. An zwee bis dräi Joer kéint een e Bilan maache fir u verschidde Punkte feilen ze goen, esou de Christian Hahn.
De Gesetzprojet iwwer de geplangte Label fir regional Produite gouf nach net am Regierungsrot ugeholl. Dat confirméiert de Landwirtschaftsministère op Nofro hin. De Projet géif de 7. August iwwerdeems net um Order du jour vum Regierungsrot stoen. De Landwirtschaftsministère wéilt iwwer de Summer nach eng Rei technesch Detailer iwwerschaffen ier de finaliséierte Projet da Mëtt September der Chamber an der Press presentéiert soll ginn.
