Kolonialgeschicht Objeten aus der Kolonialzäit: Den MNHA ass "oppe fir all Dialog"
Den MNHA ass bereet Objeten aus der Kolonialzäit un afrikanesch Länner zeréck ze ginn, wann déi dat fuerderen, esou den Historiker Régis Moes zum Optakt vun der Ausstellung iwwer d'kolonial Vergaangenheet vu Lëtzebuerg.
De Régis Moes huet d'Ausstellung "Le passé colonial du Luxembourg" zesumme gestallt, déi vun haut un um Fëschmaart ze gesinn ass.
Bei de Recherchë fir déi Ausstellung wier een zum Beispill op eng Rei Objete gestouss, déi aus dem haitegen Tansania stamen, esou de Régis Moes. Doropshin hätt een och de Nationalmusée vum Tansania kontaktéiert:
"Mir krute vun hinne bis elo nach keng Äntwert, sou datt mer warscheinlech och nach wäerte probéieren iwwer aner Weeër dorobber opmierksam ze maachen. Mir sinn natierlech oppe fir all Dialog. Virun allem wann do eng Demande wier fir Objeten zeréck ze ginn, déi e politeschen oder reliéise Wäert hunn."
Et kéint duerchaus sinn, datt nach weider Objeten aus fréiere Kolonien an der Kollektioun vum Musée fonnt ginn. Bei enger esou grousser Sammlung wéi déi vum MNHA, déi 1842 ugefaangen huet, kéint een ni ausschléissen, "datt do emol dat eent oder dat anert dobäi wier wat problematesch ass."
Et wier een och oppe fir Restitutiounen: dem Régis Moes no sollten Muséeën hautdesdaags esou mat Objeten aus der Kolonialzäit ëmgoen.
An der Mediathéik:
LauschterenMéi zum Thema
Dem Staat seng Responsabilitéit ass nach net ofschléissend gekläert
Dréit och Lëtzebuerg en Deel Verantwortung fir Verbriechen, déi an de belsche Kolonie geschitt sinn? Déi Fro kéint een haut nach net definitiv tranchéieren, seet de Régis Moes, Historiker am Staatsmusée.
