Edukatioun Nei I-Sektioun am Secondaire Classique

Ënner dem Label "Future Hub" bidde vu September un zwee Lycéeën eng Informatiksektioun un. Op der neier I-Sektioun léiere Schüler vun Troisième bis Première an engem projetsorientéierte Kader ënner anerem Programméieren.

Chris Zeien / ys

Computer an 3D Printer
"Maker spaces" si fir d'Schüler accessibel (Foto: Bigstock)

Déi nei I-Sektioun ass am Secondaire Classique ugesidelt. Si riicht sech prinzipiell un all d'Schüler, seet de Marc Schmit, Professer aus dem Lycée Technique Esch. D'Informatikssektioun wier awer speziell intressant fir Schüler, déi sech fir Mathé a Physik interesséieren, mengt de Sid Mysore vum Script, dem Coordinatiounsservice fir Recherche a pedagogesch Innovatioun vum Educatiounsministère.

Preparatioun fir Unisstudium

Niewent Schüler vun der B-Sektioun wier déi nei Formule och fir Schüler vun der C-Sektioun interessant. "An der Bio an an der Medezin ass d'Informatik ëmmer méi wichteg. Bio-Informatik ass e Fach, wou mir enorm vill Leit sichen. Sou Schüler si ganz richteg op enger Sektioun I", seet de Sid Mysore.

Schüler déi hir Première op enger I-Sektioun maachen, hunn déi selwecht Méiglechkeet fir an d’'Beruffswelt ze starten oder e Studium unzefänken, wéi Absolvente vun enger anerer Sektioun. D'Informatikssektioun géif d'Schüler, genee wéi all aner Sektioun am Secondaire Classique, awer éischter op en Unisstudium virbereeden, präziséiert de Sid Mysore.

Déi nei Sektioun start am September mat jeeweils enger Klass vu maximal 16 Schüler am Lycée des Arts et Métiers an am Lycée Technique zu Esch. Méi spéit soll d'Sektioun och am Lycée Edward Steichen zu Klierf lancéiert ginn.

Nei Fächer a Schwéierpunkten

Ugebuede gi fënnef nei Fächer. Zum Beispill, "Sciences de la programmation", "Communication Médias" an "Technologies et innovations". Schwéierpunkten, déi behandelt ginn, wiere Reseauen oder Betribssystemer awer och den Internet of things, seet de Marc Schmit.

Doriwwer eraus ginn d'Schüler am Fach "Analys a Modelisatioun vun Informatiounen" geléiert, wéi een zum Beispill mat verschiddenen Zorte vun Datebanken ëmgeet. Virun allem d'Analys vu Big Data wier eng grouss Neierung, déi bis elo net an den Enseignements-Programmer virkomm wier, sou de Marc Schmit.

D'Fach Konschtgeschicht gëtt duerch Grafikdesign ergänzt an an de Geschichtunterrecht fléisst ënner anerem d'Geschicht vun der Informatik mat an.

Nieft all den neie Fächer géife Sproochen a speziell d'Englescht e wichtege Bestanddeel vun der I-Sektioun bleiwen, sou de Sid Mysore.

Fachiwwergräifend Kompetenzen am Mëttelpunkt

D'Schüler solle Wëssen aus verschiddene Coursen a konkrete Projeten uwenden, esou de Marc Schmit. Ee Beispill kéinten zum Beispill Wahle sinn. D'Informatik wier dann ee Mëttel zum Zweck. "Et kéint sinn, datt d'Schüler missten e ganzen Internetsite opbauen, wou d'Resultater vun deene Wahle géifen ugewise ginn. Et kéint awer och sinn, datt si missten d'Saisie maache vun deene Wahlen."

Dat neit Fach "Maitrîse d'Ouvrage" wier als Koordinatiounsfach ze verstoen, esou de Patrick Straus, Direkter vum Lycée Technique Esch. Wann an engem Fach ee Projet soll realiséiert ginn, géif ee kucken, wéi een anert Fach een Apport dozou kéint bréngen.

D'Stonnenunzuel vun engem Fach, wéi se am Stonneplang festgeluecht wier, misst een als Indikatioun verstoen, sou de Marc Schmit. Et géife villméi Kompetenze wéi Teamwork oder Leadership gefërdert ginn.

Dem Schüler säi Klassesall

De Klassesall wäert net engem klasseschen Informatiksall gläichen. Ofgesi vu verschiddene festen techneschen Installatiounen soll e flexibel kënne genotzt a gestalt ginn, sou de Marc Schmit. Ouni de Frontalunterrecht wëlle schlecht ze maachen, wéilt een dësen op der neier Sektioun op e Minimum reduzéieren. Den LTE an den LAM hätten aktuell scho sougenannt "maker spaces", wou Schüler no der Schoul kënne mat Proffen u Projete schaffen. Dës Reim kéinten och am Kader vun der neier Informatiksektioun genotzt ginn.

Infrastrukture wéi 3D-Printeren, Lasercutteren oder Plottere wiere fir d'Schüler accessibel. Si hätten och eng Keycard a kéinte bis siwen Auer an hirem Klassesall bleiwen, wa si nom Cours wéilte weider un hirem Projet schaffen. "De Klassesall soll schonn dem Schüler gehéieren", seet de Sid Mysore.

De Marc Schmit an de Sid Mysore sinn iwwerdeems iwwerzeegt, datt et fir déi éischt Jore genuch Informatiksproffen an den zwee bedeelegte Lycéeë gëtt, fir d’Coursen ze garantéieren. De Label "Future Hub" wier prinzipiell op fir aner Schoulen an d'I-Sektioun wier als Pilotprojet ze gesinn. Wann a puer Joer aner Schoulen d'Sektioun wéilten ubidden, bréicht ee weider Informatiksprofesseren, esou de Sid Mysore vum Educatiounsministère.

An der Mediathéik:

Dossier vum Dag / / Chris Zeien
Lauschteren

Méi zum Thema

Muliplica Talk
Digital Konscht

Maschinnen iwwerhuelen ëmmer méi eng wichteg Roll an eisem Liewen. Ass dat ee Grond fir beonrouegt ze sinn? Mat dëser Fro gouf sech beim Festival fir digital Konscht "Multiplica" beschäftegt.

CES 2017
Technologie

Bei der Consumer Electronics Show 2017 stoungen Autoen am Mëttelpunkt. Net all neie Gadget wäert bedeit eng Revolutioun. Dat gëtt däitlech beim Hype ëm d'virtuell Realitéit. Dee flaacht nämlech of.

Léierin liest mat Schüleren Riicht Eraus
Sproochepolitik

Et ass wichteg, d’Kanner op Liesen a Schreiwen an enger Sprooch virzebereeden. Dat war eng vun de Konklusiounen an der Emissioun iwwert de richtege Wee, fir de Kanner Sprooche bäizebréngen.

Tech start-up business team discussing product roadmap for product and investment
Jonk Entreprisen

D'Regierung wëll jonk Entrepreneure motivéieren, fir eng Entreprise ze starten. Fir hinnen ze hëllefen, gëtt et eng Partie Initiativen. Lëtzebuerg, eng Start-Up Natioun?

Net verpassen

  • 08.12. Klassik Live: L'enfance du Christ

    Berlioz.jpg

    De Philharmoneschen Orchester Lëtzebuerg an d'Gächinger Cantorey an der Philharmonie: De radio 100,7 iwwerdréit de Concert haut den Owend live vun 20:00 Auer un.

Programm

Dossieren

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen