Radioen

On air

De Weekend  |  The Disliked - Money

play_arrow Live
arrow_back_ios

article

article

/ Nei Publikatioun vum Ministère fir Landesplanung

"Des cartes et des chiffres"

Nei Publikatioun vum Ministère fir Landesplanung

Pro Joer gëtt d'Surface vun 240 Futtballterrainen hei am Land verbaut, d'Hallschent dovunner gëtt komplett versigelt - dat heescht, et ka kee Waasser méi an de Buedem ofzéien. Dat ass ee vun de Fakten, déi de Ministère fir Landesplanung a senger neier Serie "Karten an Zuelen" verëffentlecht huet.

auto_stories

2 min

Lauschterenplay_arrow


Mat sengen neien, reegelméissege Publikatioune wëll de Ministère faktuell iwwer Landesplanung an virun allem dem rationellen Ëmgang mat der Ressource Land informéieren.

De Lëtzebuerger Buedem ass mat sengen 2.586 Quadratkilometer eng limitéiert Ressource, mat neien technesche Methoden a spezielle Loftopnamen ass et elo nach méi präzis méiglech de Landverbrauch ze berechnen an virun allem ze antizipéieren.

Déi éischt Publikatioun beschäftegt sech mat Landbedeckung an Landnotzung zu Lëtzebuerg.

Éischt Publikatioun: Landbedeckung a Landnotzung

Hei stellt ee fest, datt just e bësse méi wéi en Drëttel vun der ganzer Landfläch aus Bësch bestinn, en aneren Drëttel aus Wisen a Weeden. Natierlech Flächen ausserhalb dem Bësch, déi net landwirtschaftlech genotzt ginn, maache grad emol 1,86 Prozent aus.

Knapp fënnef Prozent vun der Landesfläch gi vu Wunnhaiser beluecht, knapp véier Prozent ginn op d'Käschte vu Stroosseninfrastruktur. Ronn d'Hallschent vun der Landesfläch gëtt fir landwirtschaftlech Zwecker genotzt.

Gekuckt gouf awer och no der Versigelung: 6,8 Prozent vun der Landesfläch sinn esou zoubetonéiert oder goudronéiert, dat se kee Reewaasser duerch loossen. Informatiounen, déi och fir d'Berechne vum Iwwerschwemmungsrisiko wichteg sinn.

Bleift de Landverbrauch: am Schnëtt gi 170 Hektar Land d'Joer verbraucht, dat sinn 5.000 Metercarré den Dag.