Corona-Pandemie Nei Restriktiounen

Nom ausseruerdentleche Regierungsrot e Sonndeg den Owend huet d'Regierung nei Amendementer um Covid19-Gesetz ugekënnegt.

1. Et soll ee just nach zéng Leit, an net méi 20 Leit doheem empfänke kënnen, zousätzlech zu de Leit, déi am Haus wunnen. Dat gëllt fir baussen a bannen. Well d'Police net ka bei Leit doheem kontrolléieren, kéint se awer virun der Dier stoen a kucken, wéi vill Leit eran an eraus ginn, esou de Xavier Bettel (DP). De Premier appelléiert un de "gesonde Mënscheverstand".
2. All aner Rassemblementer (nieft deenen doheem), op deene méi wéi zéng Leit sinn, si just méiglech wann d'Leit sëtzen an d'Gestes barrières anhalen. Bis elo hunn déi Critèrë réischt vun iwwer 20 Persounen u gegollt.
3. Fir d'Leit un d'Gestes barrières ze erënneren an opzeklären, soll eng grouss Informatiouns-Campagne lancéiert ginn.
4. D'Regierung wëll nei Sanktiounen aféieren. Zum Beispill fir Leit, déi sech net eng Quarantän halen. Et sollen och méi Kontrollen a Betriber ginn. Sollte si e puer mol géint d'Uweisunge verstoussen, solle si an Zukunft eng Fermeture vun dräi Méint riskéieren.

Horesca: Keng nei Restriktiounen

Bei der Horesca wëllt d'Gesondheetsministerin Paulette Lenert (LSAP) keng nei Restriktiounen aféieren. "Et gëtt keng Ursaach, do un ze setzen." Et wier wichteg, méi ze sensibiliséieren.

Et géif een net dovunner ausgoen, datt d'Leit sech am Restaurant ustiechen. D'"Ausuferungen" ronderëm d'Bistroe géif een an de Grëff kréien.

Analogen Tracing "ass elo ze packen"

D'Ekipp vum analogen Tracing kéint der Aarbecht elo erëm nokommen. Et si Leit agestallt ginn, mee et wieren Dausende vu Kontakter, seet d'Paulette Lenert. Et wier een awer um Limitt gewiescht. Et kéint een awer keng maximal Zuel nenne wéi vill Neiinfektioune pro Dag kënne retracéiert ginn. Aner Saache wiere wichteg, zum Beispill wéi séier d'Kontakter kënne retracéiert ginn.

De Xavier Bettel seet, datt Gespréicher mam Robert Koch Institut weiderlafen, fir eventuell eng komplementar App fir Lëtzebuerg ze kréien.

Séiere Vott an der Chamber?

D'Chamber soll d'Amendementer um Covid-Gesetz dëse Méindeg schrëftlech matgedeelt kréien. De Premier hofft, datt d'Chamber an de Staatsrot déi Ännerunge séier guttheesche fir datt d'Hausse vun den Neiinfektioune vum Coronavirus nees erofgeet. D'LSAP hat virum Weekend gemengt, den nächsten Donneschdeg, den 23. Juli, kéint an der Chamber schonn iwwer nei Restriktiounen ofgestëmmt ginn.