Esch 2022 Nëmmen nach ee Koordinator
Nodeems Esch rezent offiziell Europäesch Kulturhaaptstad 2022 gouf, soll déi entspriechend ASBL elo erneiert ginn. De Poste vun den aktuellen zwee Haaptkoordinatoren, dem Andreas Wagner an der Janina Stroetgen, soll nei ausgeschriwwe ginn. An Zukunft soll et nëmmen nach een eenzegen Haaptkoordinator ginn.
Datt d'Jury 21 Recommandatiounen ausgestallt hätt, géif bedeiten, datt de Projet net esou gutt wier, mengt den neien Escher DP-Schäffe Pim Knaff. D'Konkurrenzstad Kaunas hätt siwe Recommandatioune kritt, dat wier awer eng Differenz. Et géif bemängelt ginn, datt de Projet nach flou wier. Mä et wier ee jo nach net 2022, esou den DP-Politiker.
Opreegung ëm Kontrakt
Bis ewell hunn den Andreas Wagner an d'Janina Stroetgen de Projet koordinéiert. Opreegung gouf et rezent, nodeems d'Tageblatt gemellt hat, datt et kéint zu enger neier Ausschreiwung vun den zwee Poste kommen. Den DP-Staatssekretär am Kulturministère Guy Arendt sot dozou, datt am Bidbook festgehale gi wier, datt déi Plaze missten ausgeschriwwe ginn. Hien hätt sech awer soe gelooss, datt den Escher Schäfferot de Kontrakt ëm sechs Méint wéilt verlängeren.
Den Dan Biancalana, Buergermeeschter vun Diddeleng, ass sengersäits zefridden iwwer d'Aarbecht, déi bis ewell geleescht gouf. Den LSAP-Politiker hofft op eng weider Zesummenaarbecht. Hie géif déi sechs Méint als positiv empfannen, dat géif d'Méiglechkeet ginn, sech déi verschidde Recommandatiounen duerchzekucken. Et sollt ee weiderschaffen, och no deene sechs Méint.
An Zukunft soll et dann awer just een Haaptkoordinator ginn, esou den Dan Biancalana weider. D'Janina Stroetgen an den Andreas Wagner wollte sech hirersäits net dozou äusseren.
Neit Kontrollorgan
Niewent der Stad Esch an dem Pro Sud, wäert de Kulturministère dee gréissten Deel vum Projet finanzéieren. Deemno missten elo Statuten vun der ASBL Esch 2022 geännert ginn, esou den neien Escher CSV-Buergermeeschter Georges Mischo. Et géifen elo verschidde Ministèren mat an d'Boot klammen. Déi erneiert ASBL soll e Kontrollorgan ginn, deen d'Sue verwalt, esou de Pim Knaff.
Den 12. Dezember soll de Conseil d'administration vun der ASBL iwwert d'Zukunft vum Projet Esch als Europäesch Kulturhaaptstad decidéieren.
Méi zum Thema
Esch 2022: Wéi geet et weider?
Et gëtt spannend Enn dës Joers, wann d'Decisioun geholl gëtt, ob Esch am Joer 2022 de Label als "Europäesch Kulturhaaptstad" kritt oder net.
