Commerce "CLC a meng Welt féieren"

Zënter dem éischte Juni ass de Nicolas Henckes un der Spëtzt vun der Confédération luxembourgeoise du commerce. De viraussiichtleche Wuesstem vun der Bevëlkerung gesäit de néien Direkter ass eng gutt Nouvelle fir de Konsum. Déi Entwécklung misst awer vun de richtegen Investissementer accompagnéiert ginn.

Matthias Kirsch

Nicolas Henckes.JPG
De Nicolas Henckes, néien Direkter vun der Confédération luxembourgeoise du commerce.

Besonnesch d'Mobilitéit dierft eng Erausfuerderung ginn. "Soss musse mir dono kucke wéi mer duerch de Stau komme fir eis Päckelcher bei d'Leit ze liwweren", sou de Nicolas Henckes. Déi strukturell Problemer, déi de Bevëlkerungswuesstem géif mat sech bréngen, misste gutt guidéiert ginn. "Do musse mir oppasse, wa mir net en decke Problem wëlle kréien."

Léisungen wéi Home Office wieren en Ufank, mee et géif awer och Hürden ginn. "Et gëtt zwar e juristesche Kader, mee dee muss ugepasst ginn", sou den Direkter vun der Handelsconfederatioun CLC. Am Handel ass den Télétravail dacks keng Léisung, "wëll Persoune physesch am Buttek musse stoen." D'Patronat wier awer am Allgemenge positiv zu där Optioun agestallt.

Commerce geet et gutt

Dem lëtzebuergeschen Handel geet et den Ament gutt. "Mee mir representéiere ganz vill verschidde Federatiounen. Verschidde Secteure sinn am Boom, anerer bauen of." Besonnesch kleng Betriber am Verlagswiesen a Librairien hätten et schwéier. "Dat rezent Beispill an der Stad huet dat jo gewisen." Mee d'Partie wier nach net verluer, sou de Nicolas Henckes. "Et muss een oppe si fir Ännerungen. Wann ee weider mécht wéi virdrun, da gëtt et net méi einfach." Eng Méiglechkeet wier sech als Secteur zesummenzedoen a "Kräften ze bündelen".

D'Handelsconfederatioun géif awer de Commerce als Ganzt representéieren, also souwuel Librairien wéi multinational Chaînen. "Mir hätte gär, datt Butteker an der Stad sinn. Wéi eng Butteker dat sinn, dat entscheede mir net a mir kënnen de Mix och net beaflossen." D'CLC kéint mat Campagnen d'Betriber ermonteren eng Filière an der Stad ze maachen, "mee dat géif näischt hëllefen. Et muss ee sech adaptéieren un e Marché deen ännert."

"Regierung lauschtert op OGBL"

De Staat hätt trotzdem vill Efforten gemaach, fir kleng a mëttelgrouss Betriber (PME) a Start-Ups z'ënnerstëtzen. Rezent géif d'Regierung awer manner op d'Patronat zougoen, dofir ëmsou méi op d'Gewerkschaften, sou de Nicolas Henckes. "Mir gesinn datt d'Regierung a leschter Zäit méi dem OGBL nolauschtert, souguer quasi follegt."

Datt elo e puer Wahljoer virun der Dier stinn hätt dorops en Afloss gehat. "Et gëtt méi verstäerkt kommunizéiert, datt d'Regierung fir d'Leit, also hir Wieler, do ass." Den Direkter vun der Handelsconfederatioun kann dat awer verstoen, well "e Betrib ka jo net wielen. D'Politik muss hiren Job bis zum Schluss maachen an dozou gehéieren eben och d'Wahlen."

Lëtzebuerg ass attraktiv

D'Situatioun fir Entrepreneuren ass zu Lëtzebuerg "wierklech gutt", sou de Nicolas Henckes. Mee d'Konkurrenz aus dem Ausland wier grouss. "Um franséische Marché sinn d'Konditioune fir Start-Ups besser wéi bei eis. Hei sinn d'Weeër zwar relativ kuerz, mee wahrscheinlech bräichte mer eng weider Vereinfachung vun der Administratioun."

Mam Wiessel bei d'Handelsconfederatioun schafft de néien Direkter nees méi um Terrain an sicht de Kontakt mam Patron. "Aus deem Beräich kommen ech jo, an dee Beräich hat ech a menger Zäit als Generalsekretär vun der Union des entreprises luxembourgeoises e bëssen aus den Ae verluer. Op sengem neie Poste wëll de Nicolas Henckes "d'CLC a meng Welt féieren, déi digital Welt. Ech wëll d'Gefill vermëttelen, datt doru kee Wee laanscht geet, wann een am Commerce langzäiteg wëll iwwerliewen."

An der Mediathéik:

Invité vum Dag / / Matthias Kirsch
Lauschteren

Méi zum Thema

Alinea.JPG
Stad Lëtzebuerg

Mam Alinéa verschwënnt den 1. August 2017 ee vun den dräi leschte Bicherbutteker an der Stad Lëtzebuerg. Eng Ursaach wier dem Propriétaire Edmond Donnersbach no de Mangel un Attraktivitéit vun der Stad.

Thierry Nothum
Wirtschaft

D'Entreprisen am Lëtzebuerger Handel hu sech bis elo net optimal un d'Méiglechkeeten an Erausfuerderunge vum online Akafen an der Digitaliséierung ugepasst, warnt den Thierry Nothum.

Ernster.JPG
Commerce an der Stad

Ëmmer méi grouss Nimm loossen sech an der Stad néier, d'Loyeren sinn héich. De Fernand Ernster, President vun der Patronatsorganisatioun CLC a Generaldirekter vun der "Librairie Ernster", mecht sech Suergen.

Programm

  • Notturno

  • On air

    Notturno

  • Virum Dag

  • Moies-Magazin

  • Iwwer Mëtteg

Net verpassen

Dossieren

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun hire Bierger? Mir weise konkret Beispiller.

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen