D'Video- a Fernsehgeschäft bedéngt d'SES mat hire 50 geostationäre Satellitten, déi also stabil op enger Positioun stinn. De Marché vun der Iwwerdroung vu Breetband-Donnéeë leeft dogéint de Moment haaptsächlech iwwer 12 a geschwënn 20 Satellitten, déi am Weltall méi niddreg zirkuléieren. Aus där Héicht gëtt et praktesch keen Delai méi beim Signal.
D'Filial O3b, déi d'SES d'lescht Joer opkaaft hat, huet fir dës éischt Generatioun vu Satellitten nach mam franséisch-italienesche Konzern Thales Alenia Space zesummegeschafft. Elo huet d'SES ee Partenariat mat den Amerikaner vu Boeing fir de Bau vun der zweeter Generatioun annoncéiert. Eng Commande vu siwen neie Satellitten, déi 2021 solle lancéiert ginn.
Méi Capacitéit a Flexibilitéit
Dës nei Generatioun vu Satellitte géifen ee qualitative Sprong géifen duerstellen, seet den SES-Pressespriecher Markus Payer. Si géifen exponentiell méi leeschte wéi déi aktuell Satellitten.
Fir de kommerzielle Réckgang an anere Beräicher ze kompenséieren, setzt de Lëtzebuerger Satellitte-Bedreiwer SES zënter kuerzem op de Breetband-Internet. Déi nei Satellitten-Technologie, déi Boeing elo matbréngt, soll méi gënschteg sinn, ee méi groussen Territoire ofdecken a virun allem eng méi grouss Flexibilitéit bidden.
"Dir kënnt den Trafic op dëser Flott an Echtzäit zu all Moment switchen an dohinner bréngen, wou et gebraucht gëtt", seet de Markus Payer.
US-Arméi als Client?
Eng Technologie, déi zum Beispill fir den Transport um Mier interessant ass. Oder och fir Arméien. Déi spezialiséiert Publikatioun "Space Intel Report" schreift, datt d'SES mat der Breetband-Technologie virun allem och déi amerikanesch Arméi als grousse Client wéilt gewannen.
Ass dat ee Gronn, firwat sech d'SES fir d'Amerikaner vu Boeing an net fir d'Europäer vun Thales entscheet huet? "Mir hunn no reng wirtschaftlechen Aspekter entscheet", seet de Markus Payer. An et géif bis elo kee groussen Anker-Client ginn. "Dat ass eng Feelinformatioun. Dëse System wäert enger breeder Bandbreet vu Clienten zur Verfügung stoen. Dosenden, honnerten, wann net dausenden."
D'SES ass awer net déi eenzeg Firma, déi op méi kleng Satellitte setzt. Wéinst de méi niddrege Käschte kommen nei Acteuren op de Marché. Dozou gehéiere Start-upe wéi OneWeb a SpaceX oder d'Google-Mammegesellschaft Alphabet.