SES Partenariat mat Boeing versprécht méi Leeschtung a Flexibilitéit
De Lëtzebuerger Satellitte-Bedreiwer SES huet ee Partenariat mam amerikanesche Constructeur Boeing annoncéiert, fir den Ausbau vu senge Breetband-Internet-Capacitéiten. Boeing soll an den nächste Jore siwe Satellitte liwweren. Domat soll eng zweet SES-Generatioun vu Maschinne geschaaft ginn, déi sech a méi niddregen Héichten am Weltall beweege wéi geostationär Satellitten. Déi nei Technologie vu Boeing soll méi gënschteg sinn, méi Bandbreet a méi Flexibilitéit bidde wéi déi éischt Generatioun.
D'Video- a Fernsehgeschäft bedéngt d'SES mat hire 50 geostationäre Satellitten, déi also stabil op enger Positioun stinn. De Marché vun der Iwwerdroung vu Breetband-Donnéeë leeft dogéint de Moment haaptsächlech iwwer 12 a geschwënn 20 Satellitten, déi am Weltall méi niddreg zirkuléieren. Aus där Héicht gëtt et praktesch keen Delai méi beim Signal.
D'Filial O3b, déi d'SES d'lescht Joer opkaaft hat, huet fir dës éischt Generatioun vu Satellitten nach mam franséisch-italienesche Konzern Thales Alenia Space zesummegeschafft. Elo huet d'SES ee Partenariat mat den Amerikaner vu Boeing fir de Bau vun der zweeter Generatioun annoncéiert. Eng Commande vu siwen neie Satellitten, déi 2021 solle lancéiert ginn.
Méi Capacitéit a Flexibilitéit
Dës nei Generatioun vu Satellitte géifen ee qualitative Sprong géifen duerstellen, seet den SES-Pressespriecher Markus Payer. Si géifen exponentiell méi leeschte wéi déi aktuell Satellitten.
Fir de kommerzielle Réckgang an anere Beräicher ze kompenséieren, setzt de Lëtzebuerger Satellitte-Bedreiwer SES zënter kuerzem op de Breetband-Internet. Déi nei Satellitten-Technologie, déi Boeing elo matbréngt, soll méi gënschteg sinn, ee méi groussen Territoire ofdecken a virun allem eng méi grouss Flexibilitéit bidden.
"Dir kënnt den Trafic op dëser Flott an Echtzäit zu all Moment switchen an dohinner bréngen, wou et gebraucht gëtt", seet de Markus Payer.
US-Arméi als Client?
Eng Technologie, déi zum Beispill fir den Transport um Mier interessant ass. Oder och fir Arméien. Déi spezialiséiert Publikatioun "Space Intel Report" schreift, datt d'SES mat der Breetband-Technologie virun allem och déi amerikanesch Arméi als grousse Client wéilt gewannen.
Ass dat ee Gronn, firwat sech d'SES fir d'Amerikaner vu Boeing an net fir d'Europäer vun Thales entscheet huet? "Mir hunn no reng wirtschaftlechen Aspekter entscheet", seet de Markus Payer. An et géif bis elo kee groussen Anker-Client ginn. "Dat ass eng Feelinformatioun. Dëse System wäert enger breeder Bandbreet vu Clienten zur Verfügung stoen. Dosenden, honnerten, wann net dausenden."
D'SES ass awer net déi eenzeg Firma, déi op méi kleng Satellitte setzt. Wéinst de méi niddrege Käschte kommen nei Acteuren op de Marché. Dozou gehéiere Start-upe wéi OneWeb a SpaceX oder d'Google-Mammegesellschaft Alphabet.
Méi zum Thema
De wirtschaftlechen Notze vum Militär-Satellit
D'Virbereedunge fir de Militär-Satellit lafe gutt, seet de Patrick Biewer vu LuxGovSat. Enn dës Jores soll de kommerziellen, respektiv operationelle Betrib vum GovSat-1 kënnen ufänken.
SES: "Mir maache keng Politik a China"
De Satellittebedreiwer wëllt an de chinesesche Marché eraklammen. D'SES kéint awer net dofir responsabel gemaach ginn, datt déi chinesesch Regierung den Internet staark iwwerwaacht, esou de Philippe Glaesener.
"Mir brauche SpaceX"
Op der amerikanescher Weltraum-Statioun Cape Canaveral ass eng Rakéit vun der Firma SpaceX explodéiert. Eng Firma mat där de Satellittebedreiwer SES zesummeschafft fir e Satellit ze lancéieren.
Ween hält mäi Satellit op Orbit?
D'SES vu Betzder ass mat 53 geostationäre Satellitten de weltwäit gréisste Satellittebedreiwer. An déi Satellitte wëlle betreit an op Orbit gehale ginn. Just wéi? Erklärungen aus dem Kontrollraum.
