Bodycams kéinten eng Méiglechkeet si fir Situatiounen ze entschäerfen, déi riskéieren ze eskaléieren, esou de Generaldirekter vun der Police, Philippe Schrantz. Et wier een Outil fir béid Säiten: "Schutz fir de Polizist an Transparenz fir de Bierger".
D'Erfarungswäerter aus dem Ausland, wou Bodycamme schonn am Asaz sinn, schénge gutt ze sinn, esou de Philippe Schrantz.
Legale Kader muss geschaf ginn
Ier déi portabel Kameraen hei am Land kënnen an den Asaz kommen, misst awer e klore gesetzleche Kader geschaf ginn, esou de Generaldirekter vun der Police. Prinzipiell Froen, déi sech stelle wieren zum Beispill, wéini d'Kamera géing ophuelen, wat mat deene Biller geschitt, wien Accès drop huet a wéi laang se wou stockéiert ginn.
Den zoustännege Minister Henri Kox huet iwwerdeems confirméiert hie wéilt deemnächst zesumme mat der Police esou ee legale Kader schafen. Dat soll "zäitno" geschéien, esou den Henri Kox virun de Polizisten, ouni awer ee méi geneeën Zäitplang ze nennen.
Den Drock fir portabel Kamerae bei der Police anzeféieren, huet an de leschte Méint zougeholl: nodeems zu Ettelbréck ee mat engem Messer arméierte Mann vun der Police erschoss gi war, haten ënner anerem d'Policegewerkschaft an d'CSV gefuerdert, datt och hei am Land Bodycams an den Asaz kommen.
