Sozialwahlen "Positioun weider ausbauen"

Bei de Sozialwahlen am Mäerz wëllt den OGBL seng Positioun als gréisste Gewerkschaft am Land weider ausbauen. Den OGBL wier als gréisste Gewerkschaft och déi, déi sech am meeschte fir d'Interessie vun de Salariéë kéint a géif asetzen, sot den OGBL President André Roeltgen. Dem OGBL wier et zum Beispill ze verdanken, datt de System fir déi automatesch Indexéierung vun de Salairen erhale bliwwen ass.

Rick Mertens / cz

Andre Roeltgen
André Roeltgen

Ouni den Asaz vum OGBL bei de Verhandlungen iwwer d'Pan Gesetz fir d'Aarbechtszäite géif et haut hei am Land och "de-regulariséiert" Aarbechtszäiten, huet den André Roeltgen nach ervirgehuewen. D'Zil vum OGBL wier nach ëmmer, eng Eenhetsgewerkschaft am Land. Dat géif awer net heeschen, datt den OGBL aner Gewerkschafte géif marginaliséieren.

Den onofhängege Gewerkschaftsbond wier fir eng gewerkschaftlech Eenheet, "dat heescht mir hu probéiert eng Positioun ze vertrieden, wann et ëm den Index geet, wann et ëm d'Pensiounsreform geet, oder erëm Kollektivverträg, zum Beispill am Bausecteur. Mir waren déi, déi d'Eenheet proposéiert hunn, mee am Bau ass den LCGB eis massiv an de Réck gefall."

An awer wier et dem OGBL gelongen, fir e gudden Accord an dem Beräich auszehandelen. Am Gesondheetswiese géif et momentan ähnlech Problemer ginn.

"Weiderhinn de President vun der Salariatskammer stellen"

Den OGBL wëllt no de Sozialwahle weiderhin de President vun der Chambre des Salariés stellen, ënnersträicht den OGBL-President André Roeltgen. Wien dee Poste géif besetzen, wann den OGBL d'Wahle gewënnt, wëllt den André Roeltgen awer net soen. "Mir hunn dat intern diskutéiert, an dat bléift intern," esou de OGBL-President. Hie wéilt och net kommentéieren, ob hie selwer um Posten interesséiert ass.

"Ech sinn am Moment Member an der Plenière vun der Chambre des Salariés. An ech hunn elo nach eng Kéier meng Kandidatur gestallt fir erëm Member an der Plenière ze ginn. An elo waarde mir d'Resultater of, an duerno gesi mir weider."

Et misst een elo emol d'Sozialwahlen an dono d'Decisioun vun der Assemblée plénière ofwaarden.

"Inhaltlech diskutéieren a sech net a Streidereie verléieren"

Dem André Roeltgen no wier et wichteg fir eng Zersplitterung vun der Gewerkschaftszeen ze verhënneren. Wien dat wéilt erreechen, misst den OGBL stäerken, well et déi gréisste Gewerkschaft am Land ass, esou den André Roeltgen.

Den André Roeltgen wëllt sech awer net virun de Sozialwahle mam LCGB-President Patrick Dury moossen. De Kaméidi tëschent de Gewerkschafte wier am Interessi vum LCGB an net vum OGBL. Hie wéilt d'Diskussioun inhaltlech féieren a verhënneren, "datt déi ganz Diskussioun an engem Sozialwahljoer esou ausaart, datt mir an eng Logik vu gewerkschaftlecher Zersplitterung a Krich tëschent Gewerkschafte kommen".

An der Mediathéik:

Invité vum Dag / / Rick Mertens
Lauschteren

Méi zum Thema

Jean-Claude Reding
Sozialwahlen 2019

No zéng Joer un der Spëtzt vun der CSL wëllt de Jean-Claude Reding net méi als CSL-President kandidéieren. Als Successeur kann hie sech den OGBL-President André Roeltgen gutt virstellen.

Bréifwahl
Sozialwahlen 2019

264 Kandidate vu sechs Gewerkschafte gi mat an d'Wahle fir d'Salariatskammer. Déi 60 Membere vun der CSL ginn am Mäerz per Bréifwahl gewielt. Wahlberechtegt sinn 526.476 Salariéen a Pensionéierter.

Programm

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Sozialwahlen 2019

    Den 12. Mäerz ware Sozialwahlen. A ronn 3.800 Betriber, an deene méi wéi 15 Leit schaffen, goufen d'Personaldelegatioune bestëmmt. An déi 60 Vertrieder an der Salariatskammer goufen nei gewielt.

Communiquéen

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen