Corona-Pandemie Prescriptioune vereinfachen

De Bäitrag vum Carole Schimmer lauschteren

D'Substanzen, déi aktuell um Drogemarché ze fanne wieren, wiere vu schlechter Qualitéit, seet de Raoul Schaaf, Direkter vum CNDS, deen ënner anerem den Abrigado an den Drogekonsumraum geréiert.

"Net gutt heescht, datt wéineg Kokain oder Heroin an deenen Drogen dran ass. Et si vill Streckmëttel an deene Substanzen dran. Do gi Saache gebraucht, déi d'Leit éischter krank maachen."

Dealer kéime wéinst de ville Kontrolle kaum nach iwwer d'Grenz. Dat huet och gesondheetlech Konsequenze fir déi Leit, déi vun esou Substanzen ofhängeg sinn. Am Drogekonsumraum wëllt een zesumme mam Gesondheetsministère no Léisunge siche fir d'Substitutioun ze vereinfachen.

Substitutioun vereinfachen

D'Drogen- a Jugendhëllef, grad wéi Doktere mat engem Agrement, kënnen den Drogenofhängeger de Methadon, ee Substitutiounsmëttel, ubidden. Dat gëllt allerdéngs nëmme fir Heroinsüchteger. Fir de Kokainkonsum, deen am Abrigado ee Véierel vun de Persoune concernéiert, gëtt et fir den Ament keng Substitutioun.

Wéinst der aktueller Kris ëm de Coronavirus hunn d'Doktere mat engem Agrement fir Methadon d'Hänn voll ze dinn. Den CNDS fuerdert dowéinst eng Alternativ. De Raoul Schaaf seet, datt een dee Substitutiounsprogramm och vum Abrigado aus kéint ulafe loossen.

Prescriptioune méi séier verschreiwen

Den nationalen Drogecoordinateur am Gesondheetsministère, den Alain Origer, sicht no enger Léisung. Et wier een amgaang ze iwwerleeën, ob et opportun a méiglech wier, "fir eng nidderschwelleg Offer" ze erméiglechen a fir Dokteren ze mobiliséiere fir Prescriptiounen ze maachen. D'Zil wier et, fir de Leit, déi de Besoin hunn a wëllen en Traitement maachen, méi séier eng Prescriptioun ze ginn.

Et géife sech an deem Kontext juristesch Froe stellen. Dat misst awer an den nächsten Deeg gekläert ginn.