Hanner de Kulisse géife virologesch Fakteuren, epidomiologesch Zeenarien, wirtschaftlech, psychologesch Fakteuren an anerer analyséiert ginn, sou d'Ines Kurschat.
"Si soe just net oppen, op wat fir Grondlage se dat diskutéieren a mat wat fir Experten si dat diskutéiert, a wat hir Zeenarië sinn. Ech fannen et scho relativ pregnant, datt dir am Ausland verschidde Gutachten kënnt gesinn, aus ënnerschiddlechen Instituter, déi hei am Moment iwwerhaapt net virleien."
De Presserot ass och am Gaange Proposen auszeschaffe fir déi journalistesch Aarbecht nees an d'Normalitéit zréckzeféieren. Wann iwwer en Déconfinement geschwat gëtt, da misst et zum Beispill och nees méiglech si Pressekonferenzen ze organiséieren, bei deenen d'Journalisten op der Plaz kennen dobäi sinn, sou d'Ines Kurschat. Am Moment lafen all d'Pressekonferenze vun der Regierung iwwer Videoschaltung.
Schwéier Zäite fir Kultur- a Sportjournalisten
Och de Journalismus kritt kritt déi ekonomesch Auswierkunge vun der Kris ze spieren. D'Presidentin vum Presserot sot de Moien hei op der Antenn, an deene méi groussen Pressehaiser wären am Moment verschidde Journalisten am Chômage partiel.
Wei vill Journalisten am Moment a Kuerzaarbecht si, konnt d'Ines Kurschat net soen. Si huet awer betount bei den Zeitunge géif et grouss finanziell Abousse ginn, well d'Annoncëgeschäft agebrach ass. D'Editeure géifen driwwer nodenken, speziell Finanzhëllefe beim Staat unzefroen, fir d'Ausfäll bei den Annoncen ze kompenséieren.
Chômage partiel bei Saint-Paul
De Paul Peckels, Generaldirekter vum Groupe Saint-Paul Luxembourg, confirméiert op Nofro hinn, datt an de leschte Wochen effektiv e groussen Deel vun hire Recetten an der Publicitéit ewech gefall ass. Haaptsächlech an de kommerzielle Beräicher wieren d'Aktivitéiten deemno "quasi" agestallt, an et misst ee fir eng Rei Mataarbechter op de Chômage partiel missen zréck gräifen.
Wéi d'Medienhaus elo virun op hir finanziell Abousse reagéiere wäert, misst an den nächste Woche nach ausgeschafft ginn, sou de Paul Peckels.