Franséisch Presidentiellen Emmanuel Macron, e Gewënner ouni Partei

Eng historesch Defaite fir de Front national, an eng reell Ënnerstëtzung vum Vollek fir de Emmanuel Macron, esou analyséiert de Quentin Dickinson den zweeten Tour vun de Presidentiellen a Frankräich. De Journalist an Direkter vum Bréisseler Büro vu Radio France geet dervun aus, datt d'Bewegung "En Marche" vum Macron eng absolut Majoritéit bei de Parlamentswalen am Juni ka kréien.

Mick Entringer

Macron
Emmanuel Macron a Brigitte Trogneux (picture alliance/Michael Kappeler/dpa)

E groussen Deel vun de Fransouse géing den Emmanuel Macron ënnerstëtzen, huet de Quentin Dickinson am Interview mam Mick Entringer gemengt. Och wa just 43% vun den ageschriwwene Wieler fir hie gestëmmt hunn. Bei dëser Wahl ginn et - dem franséische Journalist no - zwee Gewënner: den Emmanuel Macron mat 66% vun de Stëmmen an d'Abstentioniste mat 25%. Déi rietsextrem Marine Le Pen kéim just op déi drëtt Platz.

"D'Marine Le Pen läit wäit ënnert de 40%, déi de Front national fir den zweeten Tour vun de Presidentiellen ugestrieft hat. Et ass eng historesch Defaite fir de FN." Paradoxerweis hätt hir Partei awer mat 11 Millioune Stëmmen déi meeschte Stëmmen an hirer Geschicht kritt, ënnersträicht de Quentin Dickinson.

Zréck bei eng haart riets Linn

De franséische Journalist rechent mat enger Ofrechnung bannent dem Front national. D'Linn vum Vizepresident vum FN géing a Fro gestallt ginn. De Florian Philippot hätt d'Partei opgemaach fir traditionell konservativ Wieler, déi sozial Schwaach an d'Antimondialisten. "Pour faire du social en quelque sorte ".

De Quentin Dickinson vergläicht déi Ouverture mat der Strategie vun de Nationalsozialisten an den 30er Joren an Däitschland. Dem Journalist no wäert den FN erëm méi no riets réckelen, op d'Linn vun den Traditionaliste vum FN, vum Jean-Marie Le Pen a senger Enkelin Marion Maréchal Le Pen. Et wäert an Zukunft erëm eng méi identitär Linn beim FN gefuer ginn, "dans la tradition historique de la droite dure", esou de Quentin Dickinson.

Wéi eng Majoritéit fir den Emmanuel Macron?

"Dat franséischt Vollek zeechent sech doduerch aus, datt et sech ëmmer op d'Säit vum Gewënner stellt." Déi franséisch Verfassung vun der 5. Republik géing dat ënnerstëtzen andeems et aus dem gewielte President e Genre "Monarque de droit divin" géing maachen. Et wär verreckt wéi vill Frënn een hätt, wann ee President gewielt ginn ass, sou de Quentin Dickinson.

Den neie President huet keng Partei. Fir seng liberal Zentrumsbewegung unzeféiere wäert an den nächsten Deeg e Premierminister designéiert ginn. Dem annoncéierte Profil no misst dat eng Fra ginn, déi jonk ass, mat parlamentarescher Erfahrung a mat europäescher Ausriichtung, erkläert de Journalist vu Radio France. Senger Meenung no géing sech keng esou Persoun eraus schielen. Esou datt de François Bayrou vum MoDem eventuell neie Regierungschef kéint ginn.

"UMPS, e Schied vu sech selwer"

"En Marche" wär eng grouss Bewegung vu Leit, déi sech bis elo net an der Politik engagéiert hätt, seet de franséische Journalist vu Radio France. Fir Kandidat vun der Bewegung ze gi fir d'Parlamentswalen an engem Mount, kann een sech online mellen. Eng Kommissioun entscheet, ob d'Kandidatur zréckbehale gëtt. "En Marche" vum Emmanuel Macron géing mat zwee Drëttel neie Kandidaten a mat engem Drëttel erfuerene Politiker untrieden. Et wär net auszeschléissen, datt d'Bewegung eng absolut Majoritéit bei de Legislativwahle géing kréien.

"Déi zwou traditionell grouss Parteien, LR (les Républicains) an d'Sozialiste si gespléckt a just nach e Schied vu sech selwer." Et géing eng historesch a symmetresch Schwächung gi vu béide Parteien. Trotz dem Opruff vum François Baroin, deen d'Republikaner fir d'Parlamentswalen uféiert, wär den LR keng grouss Vollekspartei méi.


De Quentin Dickinson ass Journalist an Direkter vum Bréisseler Büro vu Radio France. 2014 hat hie bei den Europawale fir d'Zentrumsallianz UDI-MoDem kandidéiert.

An der Mediathéik:

Invité vum Dag / /
Lauschteren

Méi zum Thema

IMG_2886.JPG
Franséisch Presidentiellen

Den Emmanuel Macron gëtt neie franséische Staatspresident: De liberale Kandidat vun der Beweegung En Marche krut dem Inneministère no am zweete Wahltour 66 Prozent vun de Stëmmen.

IMG_2856[1].JPG
Franséisch Presidentiellen

D'Ëmfroe soe fir den zweeten Tour vun de franséische Presidentewahlen eng Victoire vum Emmanuel Macron viraus. Mä de liberale Kandidat genéisst net sou vill Sympathien, wéi e wäert Stëmme kréien.

Programm

  • Virum Dag

  • On air

    Moies-Magazin

  • Iwwer Mëtteg

  • Resonanzen

  • Spektrum

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Festival de Cannes 2019

    Alleguer d'Artikele vum Festival de Cannes 2019.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen