Verfassungsreform Referendum iwwer d'Verfassungsreform oder net?

Déi nei Verfassung wäert fréistens Mëtt 2020 a Kraaft trieden. Déi Aschätzung mécht den LSAP-Deputéierten Alex Bodry. Et wier eng grouss Inconnue wéi d'Parteien - virop d'CSV - no de Wahlen zum Text géife stoen, sou den Alex Bodry. Den Nach-CSV-Verfassungspiecher Paul-Henri Meyers weist iwwerdeems drop hin, datt bis den éischte Vote an der Chamber nach vill ze di wier. An hie verstoppt och net, datt hie perséinlech géint de Referendum ass.

Christiane Kleer / cz

Bodry-Meyers
Alex Bodry a Paul-Henri Meyers

Et wier seng intim Konviktioun, datt ee kee Referendum iwwer déi nei Verfassung soll maachen, seet de Paul-Henri Meyers. Hie géif sech awer net géint d'Decisioun vu senger Partei stellen, d'Wieler wëllen ofstëmmen ze loossen. A sengen Ae stécht hannert dem Referendum e grousse Risiko. Et géif ëm méi wéi 120 Artikele goen, "mir kënnen de Leit net déi eenzel Artikelen zum Vote stellen", sou de Paul-Henri Meyers. De Referendum géif iwwer dee ganzen Text goen, "an dat heescht, entweder sinn d'Wieler d'Accord oder net".

Dat gesäit den Alex Bodry, President vun der Institutiounekommissioun net anescht. Hie fillt sech un d'Ofstëmmung iwwer den EU-Verfassungsvertrag am Joer 2005 erënnert. Jidderee géif aner Prioritéite setzen, a jidderee géif riskéieren, géint den Text ze stëmmen, wa säi "Lieblingspunkt sech net an deem neie Verfassungstext erëmspigelt".

Kompromësser och no Chamberwahle gëlteg?

Trotz alle Risike géif kee Wee laanscht de Referendum féieren, seet den Alex Bodry. Hie fäert, datt den Text um Wee fir dohin nach där enger oder anerer Gefor kéint ausgesat ginn, Stéchwuert Chamberwahlen. "Stinn d'Parteien och no de Wahlen zu hirem Wuert a Saache Verfassung?", freet den Alex Bodry an hëlt d'CSV an d'Viséier.

D'CSV wéilt e groussen Dialog mat de Leit, dësen Dialog misst awer och zu eppes féieren. Déi grouss Fro, déi sech géif stelle wier, ob bannent de Parteien Drock géif gemaach ginn, fir déi Kompromësser déi erreecht goufen iwwer Bord ze geheien. "Wann dat geschitt, da kënne mir eis Verfassung mat engem Begriefnis drëtter Klass ënnert de Buedem bréngen", seet den Alex Bodry.

Ofhängeg Gesetzer a Justizrot

Et stelle sech awer nach aner Froen. Dem Paul-Henri Meyers no musse ronn zwielef Gesetzestexter wéinst Verfassungsreform adaptéiert oder nei geschriwwe ginn. Zum Beispill dat iwwer den Nationale Justizrot, deen iwwer d'Verfassung geschaaft gëtt. Et misst ee wëssen, wéi de Rot organiséiert gi soll. Fir datt de Verfassungstext wierklech gräife kéint, misst dat Gesetz deemno gestëmmt ginn.

D'Institutiounekommissioun huet der Regierung elo eng Lëscht gemaach mat den Texter, un deene muss geschafft ginn. Den Alex Bodry fënnt, datt den éischte Vote um Text an der Chamber eréischt no den Europawahlen ofgehale soll ginn, den Text kéint da fréistens Mëtt 2020 a Kraaft trieden. De Paul Henri Meyers kéint sech den zweete Vote, also de Referendum, dee jo bindend wäert sinn, schonn no den Europawahle virstellen.


Bäitrag vum Christiane Kleer am Panorama vun 12 Auer:

Lauschteren


Méi zum Thema

constitution 1868.jpg Dossier
1868-2018

D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Paul-Henri Meyers
Verfassungsrevisioun

De Paul-Henri Meyers geet dovun aus, datt ee sech nach virun der grousser Vakanz iwwer de Verfassungstext wäert eens ginn. Deen Text soll dann an der neier Legislatur gestëmmt ginn.

Alex Bodry
Verfassungsreform

En Nationale Justizrot kann agefouert ginn ier d'Verfassung reforméiert gëtt. D'CSV kéint déi blo-rout-gréng Koalitioun hei also net blockéieren, freet sech den LSAP-Fraktiounschef Alex Bodry.

Audience in the conference hall.
Verfassungsreferendum

Ëmmer méi Deputéiert sinn der Meenung datt Hierscht 2017 net optimal ass. Haapt Argument ass, datt de Gemengewahlkampf an d'Campagne fir de Verfassungsreferendum da géife matenee vermëscht ginn.

Programm

Net verpassen

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • Kuriositéiten aus der Lëtzebuerger Sprooch

    Si oder hatt? Zwee oder zwou? Domat oder domadder? Lëtzebuergesch ass och fir Mammesproochler net ëmmer einfach. Mir ginn der Saach op de Fong.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen