Uni Lëtzebuerg Méi Matsproocherecht fir d'Zivilgesellschaft

D'Handelskammer proposéiert, datt d'Uni en neit consultatiivt Organ kritt. Dëst Gremium kéint bei Nominatiounen a strategesche Froe een Avis ofginn, esou d'Sylvia Ridlesprige. Am Gesetzprojet iwwer d'Uni-Reform géif et och Klärungsbedarf ginn, wat d'berufflech Weiderbildung ugeet.

Pia Oppel

Sylvia Ridlesprige
D'Sylvia Ridlesprige ass bei der Chambre de Commerce ënnert anerem fir de "Lifelong Learning" zoustänneg (© Chambre de Commerce)

D'Chambre de Commerce bedauert, datt si net consultéiert gouf, fir d'Conceptioun vum geplangten Zentrum fir "Formation Continue" op der Uni Lëtzebuerg. Dësen Zentrum ass am Gesetzprojet iwwer d'Uni-Reform virgesi a soll d'Gestioun iwwerhuelen vun der:

"formation continue et professionelle offerte par l'Université menant au grade de bachelor, et notamment des programmes ayant une vocation professionalisante, de la procédure de validation des acquis de l'expérience".

Genee an dësem Creneau ass awer ënnert anerem d'Chambre de Commerce schonn aktiv, well si deen Optrag per Gesetz huet. 2016 huet si zesumme mat der Chambre des Métiers den "Institut Supérieur de l'Economie" (ISEC) gegrënnt. Hei gi Programmer fir d'Beruffsausbildung an d'berufflech Weiderbildung ugebueden, fir déi een och en Diplom ka kréien. Den ISEC huet och eng entspriechend Accreditatioun vum Héichschoulministère.

Ee "kohärenten Ecosystem"

Wann d'Uni elo hir Offer an deem nämmlechte Beräich wéilt ausbauen, da misst op d'mannst eng Coordinatioun mat den aneren Acteuren assuréiert sinn, sou d'Sylvia Ridlesprige. D'Chambre de Commerce géif gären dozou bäidroen, datt et zu Lëtzebuerg eng kohärent Offer an der berufflecher Aus- a Weiderbildung gëtt: "An dofir ass eis Propos, d'Beruffschamberen d'office an d'Gouvernance vun dem neie Centre anzebauen."

Et wier wichteg sech ofzeschwätzen, fir datt jiddereen "a senge Kärdomäner déi Offer kann ubidden, déi vum Marché gefrot ass". Aus dem Gesetzprojet geet net ervir a wéi enge Beräicher d'Uni an Zukunft Formatioune wéilt ubidden. De Risiko vun Iwwerschneidungen ass der Sylvia Ridlesprige no am Gréisste "bei allem, wat Gestion d'entreprise" ugeet.

Gouvernance kann nach verbessert ginn

D'Chambre de Commerce proposéiert och, datt d'Uni een neit consultatiivt Organ kritt. Vertrieder vun de Beruffschamberen, aneren Institutiounen an aus der Zivilgesellschaft allgemeng kéinte bei Nominatiounen a strategesche Froe een Avis ofginn.

Zum Beispill stellt d'Chambre de Commerce a Fro, datt d'Vertrieder vum Conseil de Gouvernance vun der Regierung genannt ginn. Dat externt Opsiichtsgremium géif mat dëser Reform immens gestäerkt ginn a senge Kompetenzen, wouduerch sech ëmsou méi d'Fro vun der Representativitéit géif stellen.

D'Uni hätt mëttlerweil eng grouss Wichtegkeet fir d'Land. An hiren Optrag wier et och, nieft akademescher Fuerschung a Léier zur sozialer, kultureller an ekonomescher Entwécklung vum Land bäizedroen. Och dowéinst misst een d'Nominatiounsprozedur vum Conseil de Gouvernance "nuancéieren", seet d'Sylvia Ridlesprige:

"Mir mengen, datt een hei och sollt der Communauté universitaire ee Matsproocherecht ginn, an och externen Acteuren aus der Ekonomie an der Zivilgesellschaft."

Sylvia Ridlesprige

Méi zum Thema

Raymond Bisdorff / Martine Hansen / Marc Hansen
Uni Lëtzebuerg

Den delegéierten Héichschouliminister Marc Hansen an d'CSV-Deputéiert Martine Hansen plaidéiere fir ee staarkt externt Opsiichtsgremium. D'Proffe mussen d'Soen hunn, fënnt de Raymond Bisdorff (APUL).

Ludwig Neyses
Uni Lëtzebuerg

Fir den neien Interims-Recteur sinn d'Budgetsproblemer vun der Uni op eng "Management-Kris" zréck ze féieren. Et wieren organisatoresch a personell Konsequenze gezu ginn, esou de Ludwig Neyses.

Programm

Dossieren

  • Leipziger Buchmesse 2019

    D'Valerija Berdi an de Michel Delage waren dëst Joer fir de radio 100,7 op der Leipziger Buchmesse. All hier Artikelen a Bäitrag zum Thema fannt Dir hei.

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • Offre d'emploi: 1 journaliste (m/f)

    L'Établissement de Radiodiffusion Socioculturelle, opérateur de la radio de service public radio 100,7, recherche pour ses rédactions un(e) journaliste

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen