Dës Zuele ginn aus dem Bilan ervir, deen d'Mammenhaus vun der Dageszeitung Tageblatt viru Kuerzem beim Firmeregëster ofginn huet. Virun zwee Méint huet Editpress seng franséisch Wochenzeitung Le Jeudi agestallt - allerdéngs goung et och anere Publikatiounen, un deenen Editpress bedeelegt ass, d'lescht Joer net ganz gutt. Sou huet beispillsweis d'Revue trotz Spuermesuren eng Perte vu 526.000 Euro gemaach. Lumedia, d'Firma, déi d'Dageszeitung Le Quotidien erausgëtt, huet eng Perte vu 75.000 Euro gemaach a weist kumuléiert Pertë vun iwwer siwe Milliounen Euro aus.
D'Scholde vun Editpress reduzéieren
An sengem Rapport de gestion schreift den Direkter vun Editpress, Jean-Lou Siweck, d'Fermeture vum Le Jeudi wier Deel vu méi breeden Efforte fir d'Scholde vum Grupp ze reduzéieren, notamment duerch d'Vente vu Bedeelegungen an Immobiliewäerter.
An deem Kontext géif och driwwer nogeduecht, fir en neie Siège nieft d'Dréckerei an d'Industriezon Sommet ze bauen. Doduerch géif - wat net am Bilan steet - de Siège an der Kanalstrooss fräi ginn. D'lescht Joer hat d'Duechtergesellschaft vum Grupp Comed hiert Gebai op der Route d'Esch an der Stad verkaf, wouduerch si dem Mammenhaus eng virgezunnen Dividend vun 2,8 Milliounen Euro konnt iwwerweisen, ouni déi d'Perte nach méi grouss gewiescht wier.
No der Fermeture vum Jeudi sot de Jean-Lou Siweck um radio 100,7, bei den aneren Titele vum Grupp misst drop opgepasst ginn datt d'Käschten a Relatioun si mat de Revenuen, wat e permanent Upasse bedeite géif. Mam Jeudi wier d'Zeitung mam klengste Lektorat zougemaach ginn. Déi aner Zeitungen, déi Editpress erausgëtt, wiere wäit ewech vun den nidderege Lecteurszuele vum Jeudi.