Sport Rugby zu Lëtzebuerg

Rugby ass e klenge Sport zu Lëtzebuerg. Et gëtt keen nationale Championnat. De Rugby Club Lëtzebuerg an de Rugby Club Renert vu Walfer spillen allebéid an Däitschland. An da gëtt et awer och eng Nationalequipe. Déi huet de leeschte Samschdeg am Kader vun der Europameeschterschaft géint Moldawie gespillt.

Maurice Molitor / cbi

Rugby zu Lëtzebuerg
Rugby gëtt zu Lëtzebuerg ëmmer méi beléift. Foto: Christian Schaack

Si heesche Matthew, Scott an Charlie oder och Josselin, Hugues a Gauthier. Si kennen all den Text vun der Heemecht a sangen e mat - souguer wa si keen oder nëmme wéineg Lëtzebuergesch schwätzen.

De President vun der Rugby-Federatioun Steve Karier ass net wéineg houfreg op seng Multikulti-Trupp. Rugby géif zimlech genee d'Lëtzebuerger Gesellschaft reflektéieren: D'Hallschent vun den Awunner wieren nämlech net-Lëtzebuerger, "och wa Stack-Lëtzebuerger dat net wëllen agesinn. Déi liewen, déi wibbelen, an déi kënnen duerchaus zesummen, egal vu wou si hierkommen." D'Equipe géif mat Leidenschaft hanner enger gemeinsamer Saach stoen.

En internationale Sport

De Public vum Rugby ass grad esou gemëscht. Et mierkt een: Rugby ass à la base e Sport vu Leit aus Groussbritannien an Irland, aus Frankräich - grouss Rugby-Natiounen, déi de Sport och op Lëtzebuerg bruecht hunn - den éischte Club (den RCL) gouf Mëtt de 70er Jore gegrënnt.

D'Expats stelle bis haut de Stack an de Veräiner, och vun der Nationalequipe: fir am Rugby fir eng Natioun spillen ze kennen, muss een dräi Joer am Land gelieft hunn. Déi Limite gëtt elo op fënnef Joer eropgesat: dat mécht dem Nationaltrainer Jonathan Flynn, e Schott, deen zanter enger Dose Joren zu Lëtzebuerg ass, e bësse Suergen. Fir e klengt Land wéi Lëtzebuerg, dat op net-Lëtzebuerger ugewisen ass, ass dat net esou einfach. "Eist Liewe wäert an den nächste Jore sécher méi schwéier ginn", seet hien.

Och vill Jonker spille Rugby

Mee, dank de Promotiounsefforten an de Schoulen, der Nowuess-Aarbecht an de Clibb a beim Verband ginn et och ëmmer méi jonk Lëtzebuerger, déi de Sport hei kennen a spille léieren. Bei de Jonke si wierklech immens vill Lëtzebuerger do, seet den Nationalspiller Yared Ketema.

Och wa Ruby op den éischte Bléck rabiat ausgesäit, sou ass et e Sport fir déi ganz Famill. Foto: Christian Schaack

Déi Jonk géifen am Alter vun 18 Joer zwar dacks ophalen, well si op d'Uni ginn an dann net méi géifen zeréckkommen. "Do verléiere mir der ganz vill", seet de Yared Ketema. Bei der Nationalequipe géifen et vläicht manner Lëtzebuerger ginn, mee bei de Junioren (U20, U18)

D'Motivatioun ass do

Spéitstens wéi d'Rugby Rout Léiwen (sou nenne si sech) de Score e Samschdeg an der Nospillzäit op 23-10 eropgeschrauft haten, war déi éischt Victoire op deem Niveau perfekt. D'Nationalequipe bleift an där aktueller Divisioun, an där si virun zwee Joer schonn eemol gespillt hat, aus där si awer deemools ouni Victoire direkt erëm erausgefall war.

Dat sollt aus engem ganz bestëmmte Grond net nach eemol passéieren, wéi de Kapitän, de Romain Kimmel, erkläert: Et wéilt een am neie Stadion spillen, op deen ee ganz ongedëlleg géif waarden, an dat och an dëser Divisioun.

E Sport fir déi ganz Famill

Gemengt ass den nationale Fussball- a Rugbystadion op der Kockelscheier, deen an engem Joer fäerdeg gëtt. An op deen och d'Rugby-Supportere sech freeën: Et sinn der elo schonn ëm déi 1.000, déi d'Nationalequipe kucke kommen. Am neie Stadion ginn et der sécher net manner, an och déi speziell Rugby-Ambiance wäert do net verluer goen.

D'Spectateure wiere léif mateneen, seet de President vum Supporterclub Fränk Rosenfeld. Kanner kënne matkommen, well et egal ass, ob Géigner oder d'Lokalequipe do géif sëtzen. "Do ass iwwerhaapt kee Problem, datt do musse verschidde Bléck sinn, wou ofgegrenzt sinn." Dat wier déi Fairplay-Ambiance, déi aus dem britesche Rugbysystem géif kommen. "Et brauch ee keng extra Kontrollen, kee Policeasaz. Et ass einfach vill méi Relax. Et geet een heihin, wéi op e Familljefest praktesch."

An der Mediathéik:

Aktuelles / / Maurice Molitor
Lauschteren

Méi zum Thema

Fussballstadion
Fussball

Am Mee 2020, e knappt halleft Joer méi spéit wéi ugangs virgesinn, soll de Bau vum nationale Fussball- a Rugbystadion fäerdeg sinn. Deen éischte Match gëtt wahrscheinlech am September 2020 do gespillt.

Fussball Fans
Réckbléck 2018

D'Nationalequipe an der Nations League, den F91 an der Europa League: De Lëtzebuerger Fussball huet en aussergewéinlechen Hierscht erlieft. De Maurice Molitor mat engem Fussball-Réckbléck.

Programm

  • Notturno

  • On air

    Virum Dag

  • Moies-Magazin

  • Iwwer Mëtteg

  • Resonanzen

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Festival de Cannes 2019

    Alleguer d'Artikele vum Festival de Cannes 2019.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen