Flüchtlingspolitik Schaarf Kritik vum éisträicheschen Europaminister

De Jean Asselborn hat an engem Interview mat der Zeitung Die Welt gesot, den éisträichesche Kanzler Sebastian Kurz géif eng direkt mënschlech Solidaritéit refuséieren. Domadder géif hie seng Qualitéit verléieren Europäer ze sinn.

Éisträich fënnt Behaaptungen "absurd"

An engem Schreiwes, dat vun der éisträichescher Ambassade weider geleet gouf, heescht et dat wieren absurd Behaaptungen. Éisträich hätt pro Kapp déi véiertgréisst Communautéit un Afghanen, esou den éisträicheschen Europaminister Alexander Schallenberg.

Wa Lëtzebuerg genee sou solidaresch wier, misst et méi Afghanen ophuele wéi bis elo. De Jean Asselborn wier also net an enger Positioun fir Rotschléi ze ginn, an et wier och net de Moment fir bëllege Populismus.

Kritik aus Däitschland

Kritik um Jean Asselborn kënnt och aus Däitschland: De Bundesinneminister Horst Seehofer weist wéineg Verständnis fir dem Lëtzebuerger Ausseminister seng Dreeung, eng geplangt EU-Deklaratioun zu Afghanistan ze blockéieren wéinst ze wéineg Ënnerstëtzungs-Zousoen.

De Jean Asselborn sollt an der Diskussioun d'Problemer vun de grousse Länner an der EU méi consideréieren. Et géif een do net vun e puer honnert, mee e puer dausend Leit schwätzen.

Keng konkret Annoncen vu der EU

An Interview mat der "Welt" huet de Jean Asselborn gefuerdert, d'EU misst bereet si fir 40.000 bis 50.000 sougenannte "Resettlement"-Plaze fir afghanesch Flüchtlingen zur Verfügung ze stellen.

D'EU huet bis elo - Contraire zu den USA, Kanada oder Groussbritannien - nach keng konkret Annoncë gemaach, wéi vill Refugiéeë kéinten am Kader "Resettlement-"Programmer opgeholl kéinte sinn.

Den LSAP-Ausseminister huet dobäi och den éisträichesche Kanzler kritiséiert: Éisträich, Ungarn a Slowenien hu rezent annoncéiert, keng Flüchtlingen aus Afghanistan méi wëllen opzehuelen.

Notiz: Dësen Artikel gouf um 14:30 Auer à jour gesat.