Schoul SEW: "Meisch huet sech clever ugeluecht mat der Lycéesreform"

Den Educatiounsminister Claude Meisch hätt méi eng "subtil Manéier", wei seng Virgängerin Mady Delvaux-Stehres, esou de Jules Barthel vun der Enseignantsgewerkschaft SEW-OGBL. Déi genee Auswierkungen vun der Lycéesreform wieren eréischt an e puer Joer ze gesinn.

Rick Mertens

Folscheid Barthel.JPG
De Lex Folscheid an de Jules Barthel

Duerch d'Reform sollen d'Lycéeë vu September u méi Fräiheete kréie fir hir Bildungsoffer individuell ze gestalten. D'Enseignantsgewerkschaft SEW-OGBL fäert, datt doduerch e "Konkurrenzdenken" tëscht de verschiddenen ëffentleche Lycéeën entsteet. Dat kéint d'Direktioune vu verschiddene Lycéeën dozou verleeden, Changementer ze decidéieren, mat deenen d'Enseignanten net averstane sinn, sou de Jules Barthel.

Als Beispill nennt de Gewerkschaftler de Lycée Michel Lucius. Hei wier "vun uewen erof, vun der Direktioun decidéiert ginn," déi engleschsproocheg Klassen auszebauen. D'Filière hätt sech dowéinst "ze séier entwéckelt", an et géif elo u qualifizéiertem Personal feele fir an dëse Klasse Schoul ze halen.

"Déi néideg Ressourcen feelen dacks"

De Jules Barthel gesäit mat der Lycéesreform ähnlech Problemer op aner Schoulen duerkommen: "Et ass allgemeng e grousse Problem an der Politik vum Minister Meisch, den ganz dacks mat Iddien kennt, déi dobausse ganz gutt bei Elteren ukommen, wou awer hannendrun déi néideg Ressourcë feelen."

De Lex Folscheid vum Educatiounsministère weist d'Kritik vum SEW zréck. Hie géif net verstoen, datt den SEW fäert datt d'Direkteren "ze vill Méiglechkeete kréien". D'Reform géif nämlech virgesinn, datt d'Decisiounen an de Lycéeën op eng "basisdemokratesch" Aart a Weis geholl ginn.

De Ministère "vertraut den Acteuren um Terrain"

Eng Schoul kéint, zum Beispill, decidéieren d'Sektioun fir Naturwëssenschaften esou ofzeänneren, datt d'Biologie duerch Ingenieurwëssenschaften oder Informatik ersat gëtt. Iwwer esou Decisioune géif awer "all eenzelen Enseignant mat ofstëmmen," sou de Lex Folscheid. Andeems d'Lycéeë méi Autonomie kréien, géif de Ministère weisen, datt en "den Acteuren um Terrain vertraut".

Iwwer dat nächst Schouljoer soll all Lycée en eegenen Entwécklungsplang ausschaffen, an deem déi pedagogesch Approche definéiert gëtt. Den SEW-Gewerkschaftler Jules Barthel bezeechent dat als eng "subtil" politesch Erugehensweis: "Lues a lues ginn eng Rei Aspekter agefouert, déi een net direkt an der Klass an an der Aarbecht mat de Schüler gesäit. An eréischt wann de Puzzle vun deenen eenzele Stécker an den nächste Joren zesummegesat gëtt, wäert een d'Konsequenze vun där Reform hei erkennen."

An der Mediathéik:

Invité:e vum Dag / / Rick Mertens
Lauschteren

Méi zum Thema

claude meisch.JPG
Schoulpolitik

All Schüler huet seng eege Besoinen, d'Schoul muss méi individuell op d'Kanner agoen, seet den Educatiounsminister. Dat bedeit méi Autonomie fir d'Acteuren. De Claude Meisch wëll awer net falsch verstan ginn. 

An der Form soll de Gesetzprojet iwwert d‘Lycéesreform integral iwwerschafft ginn; déi generell inhaltlech Ausriichtung bleift bestoen; esou op Nofro hin den Educatiounsminister.

Net verpassen

  • Offre d'emploi: Redakter/Redactrice Web

    radio 100,7

    Den Média de service public 100,7, deen de radio 100,7 bedreift, sicht en/eng neie/nei Redakter/Redactrice fir d'Onlineredaktioun mat engem Aarbechtskontrakt op onbestëmmten Dauer (CDI) fir 40 Stonnen d'Woch.

Dossieren

  • Chamberwalen 2023

    Am November gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen