D'Erklärung dofir läit am Ausland: Et ginn eben eng Rei Leit, déi hei zu Lëtzebuerg ugemellt sinn, déi awer net hei geimpft goufen. An dofir tauche si och a kenger Lëtzebuerger Statistik op. Ob de reellen Impf-Taux elo exakt véier Prozentpunkten iwwert deem offizielle läit, wëllt de Joel Mossong, Epidemiolog bei der Inspection sanitaire, net soen - dofir ass de Echantillon vun der Ëmfro ënner 600 Leit awer ze kleng, mee et géif awer een Ordre de grandeur ginn.
Studenten déi am Ausland liewen a studéieren sinn ee Beispill. Mee souguer wann ee si an all déi aner am Ausland vaccinéiert Residente mat abezitt, bleift de Lëtzebuerger Impf-Taux hannert deem vu villen anere Länner zréck.
Sondage: Zwielef Prozent vun de Leit hunn uginn nach net geimpft ze sinn
An der Ëmfro, déi bei engem representativen Echantillon vu 600 Leit gemaach gouf, hunn zwielef Prozent uginn, nach net geimpft ze sinn. Ee Prozent war awer decidéiert dat elo ze maachen, bei deenen aneren eelef goufen et zwou Kategorien. Déi eng, déi nach waarden, déi soen, eng Impfung vun zousätzlechen Informatiounen iwwer Laangzäit-Folgen ofhängeg ze maachen.
"An et ass awer och d'Hallschecht vun deene Leit, déi gesot hu si wéilte sech net impfen, déi soen, datt se den Autoritéiten, déi d'Impfstoffer verdeelen an doriwwer kommunizéieren, net trauen. Bei deenen ass effektiv d'Probabilitéit manner grouss, datt déi nach hir Meenung änneren."
Zwee aner Chifferen nach aus der Sondage: 87 Prozent vun den Duebel-Geimpfte si schonn geboostered oder wäerte sech boostere loossen. An zwee Drëttel vun den Eltere vu Kanner tëscht 5 an 11 Joer soen, géifen déi Kanner och impfe loossen.