Steieren Stock options: Majoritéitsparteie fuerdere Reform

Mat de Stock options sollt Lëtzebuerg méi attraktiv fir Entreprisë gemaach ginn. Salariéeë kënnen mat Stock options bezuelt ginn, fir vu steierlechen Avantagen ze profitéieren. Mä elo fuerderen och Vertrieder vun de Majoritéitsparteien, datt d'Stock options op d'mannst reforméiert ginn.

Matthias Kirsch / pre

Euro-Mënzen.jpg
Foto bigstock / weyo

Salariéen, déi mat Aktien an der Form vu Stock options bezuelt ginn, bezuelen op deem Revenu just 17,5 Prozent Stéieren. Dat ass däitlech manner, wei wann déi Revenuen nom Steierbarême besteiert ginn. Dës Praxis war 2002 duerch eng Circulaire vun der Steierverwaltung agefouert ginn.

D'Steierverwaltung schätzt den "déchet fiscal" vum Staat bei 150 bis 180 Milliounen Euro fir d'Joer 2016.

"Net drobar"

Aus där Situatioun misst een erauskommen, sot d'Viviane Loschetter, Fraktiounscheffin vun déi gréng. An der Majoritéit misst een d'Käpp zesummestrecken, fir eng Léisung ze fannen. D'Stock options wieren "eigentlech net drobar", sou d'Viviane Loschetter.

Mat de Suen, déi duerch d'Stock options verluer ginn, kéint een eppes fir d'Ëffentlechkeet maachen. Wei een d'Stock options konkret ännere soll, konnt d’Viviane Loschetter net soen.

"Zweifelhaft Praxis"

Och den LSAP Deputéierte Franz Fayot kritiséiert de System vun de Stock options. Vun engem Standpunkt vu Steiergerechtegkeet aus wier et eng zweiwelhaft Praxis. Senger Meenung no missten d'Stock options awer net onbedéngt ofgeschaaft ginn.

Eng Reform, fir d'Stock options "nei ze kadréieren", op hiren ursprénglechen Zweck, géif eventuell duer goen. De Franz Fayot kéint sech virstellen, an engem reforméierte System Stock options just nach méiglech ze maachen, wann et sech ëm Aktie vun der eegener Gesellschaft handelt.

"Sozial ongerecht"

D'CSV wëll d'Circulaire iwwert d'Stock options ganz ofschafen. Fir den CSV-Deputéierte Gilles Roth sinn d'Stock options fundamental ongerecht.

Déi 150-180 Milliounen Euro Steiergelder, déi dem Staat 2016 verluer goungen, géifen deem Montant entspriechen, deen d'Leit zu Lëtzebuerg bannen zwee Joer duerch de sougenannten "impôt d'équilibrage budgétaire" bezuelt hätten.

D'Leit hätten also mat der sougenannter Krisesteier bezuelt, fir de Steierverloscht duerch d'Stock options auszegläichen, sou de Gilles Roth. Dat wier "sozial ongerecht an net normal".

Reportage Stock options

Méi zum Thema

steieren suen.jpg
Steierpolitik

Déi blo-rout-gréng Koalitioun ass net bereet op d'Fuerderung vun der CSV anzegoen, an déi sougenannt Stock Options op den 1. Januar 2017 ofzeschafen. De Regime géif den Ament nach analyséiert ginn.

Business Hands Put Coin
Steierreform

D'Steierverwaltung fuerdert méi Informatioune vun de Betriber iwwer d'Salairen, déi se a Form vun Optiounen op Aktien ausbezuelen. Déi Donnéeë sinn och fir d'Steierreform relevant.

Programm

  • Mat Groove a Séil

  • On air

    Notturno

  • Vu 6 bis 10

  • Vun 10 bis 2

  • Vun 10 bis 2

Net verpassen

  • De radio 100,7 sicht Redakteren/Animateuren

    radio 100,7

    De radio 100,7 sicht fir seng Magasinn-Redaktioun 1 Redakter/Animateur (m/w) 20 St/W (CDD 1 Joer)
    an 1 Redakter/Animateur (m/w) 40 St/W (CDI) fir direkt ze engagéieren.

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen