Impfcampagne Tëschestand an den Alters- a Fleegeheemer

Bis de 25. Mäerz sollen d'Bewunner vun allen Alters- a Fleegeheemer a vun de Strukture fir Leit mat engem Handicap déi béid Impfdosisse kritt hunn. Dës Hoffnung huet d'Familljen- an Integratiounsministerin Corinne Cahen gëschter an der Chamber ausgedréckt. Eelef éischt Maisons de soins wiere scho komplett fäerdeg géint de Coronavirus geimpft, d'Bewunner hunn also déi zwou Dose kritt.

Serge Kesseler / cbi

Corinne Cahen
D'Familljeministerin Corinne Cahen. Foto: Chambre des Députés (Archiv)

Lauschteren


Nieft dem Personal aus dem Gesondheets- a Fleegesecteur gi jo d'Bewunner aus den Alters- a Fleegeheemer an aus de Strukture fir Leit mat engem Handicap prioritär geimpft. D'Ministerin Corinne Cahen huet an der Chamber aktuell Zuele genannt: an eelef Maisons de soins, a fënnef CIPAen an a véier Strukture fir Leit mat engem Handicap, hätte Leit déi éischt Dosis kritt.

Vun haut u sollen déi mobil Ekippen d'Bewunner aus 25 weideren Alters- a Fleegeheemer an aus 24 weidere Strukture fir Leit mat engem Handicap impfen. D'Corinne Cahen hofft, datt bis de 25. Mäerz d'Bewunner vun all d'Strukturen hir zweet Dosis kritt hunn.

Bei de Bewunner, déi bis elo d'Méiglechkeet dofir haten, hätte der ganz vill sech impfe gelooss, esou och d'Gesondheetsministerin Paulette Lenert - et géif hei en Taux d'adhésion vun 86,7 Prozent ginn. "Dat ass natierlech en Tëschebilan, mir sinn nach net fäerdeg."

Paulette Lenert schwätzt sech géint "Ringimpfung" aus

Fir eng séier Ausbreedung vum Virus an den Alters- a Fleegeheemer ze vermeiden, hat de Professer Claude P. Muller virun e puer Deeg eng sougenannte "Ringimpfung" recommandéiert, fir all d'Kontaktpersoune vun engem Corona-Infizéierte séier ze impfen.

An der Chamber dorop ugeschwat, huet d'Paulette Lenert sech dogéint ausgeschwat, well d'Impfunge réischt no enger Zäit géife wierken. Eréischt zwou bis dräi Wochen no der éischter Impfung géif den Effekt vum Vaccin asetzen, a siwen Deeg no der zweeter Impfung wier wier de Schutz voll do.

Et géif een also mam systemateschen Impfen an den Heemer viru fueren, esou d'Ministerin. Déi éischt Bewunner ware viru gutt engem Mount, de 6. Januar vaccinéiert ginn.

Méi zum Thema

Dateschutz an der Impfcampagne
Covid-Gesetzer

Den Dateschutz gëtt méi kloer am Covid-Gesetz gereegelt. Bei der Impfcampagne solle just nach déi Date laang gehale ginn, bei deenen et Sënn mécht. Daten, déi net gebraucht ginn, solle fréi geläscht ginn.

Impfung géint Covid-19
National Impfstrategie

An de Phasen 2 bis 6 sollen zwee Krittäre bestëmmen, wie wéini géint Covid-19 geimpft gëtt. Engersäits spillt den Alter eng Roll, anerersäits verschidde Krankheetsbiller. Ufank Mäerz soll déi nächst Phas ufänken.

Luc Feller
Impfcampagne

E Véierel vun de Bewunner vun Alters- a Fleegeheimer hätt bis elo kënne geimpft ginn, esou den Haut-Commissaire à la Protection nationale, Luc Feller. Der Invitatioun fir d'Impfzentrum sinn 48 Prozent vun de Leit nogaangen.

Programm

Net verpassen

  • Annonce: Recherche d'un chef de la programmation

    Gebai vum radio 100,7

    L'Etablissement de Radiodiffusion Socioculturelle, opérateur de la radio de service public radio 100,7, recherche 1 chef de la programmation (m/f) pour contrat à durée indéterminée et à temps plein.

Dossieren

  • Déi eeleft Editioun vum LuxFilmFest

    Trotz Pandemie gëtt de Luxembourg City Filmfestival organiséiert. Déi 11. Editioun (4.-14. Mäerz) kritt dëst Joer awer eng liicht aner Nues: Filmer ginn deels am Kino deels online gewisen.

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen