D'Nationale 3 soll d'Diddenuewener Strooss entlaaschten an d'Verbindung tëschent der Gare an der Cloche d'Or erméiglechen. Deen Ament gëtt och un der Verbreederung vun der Rue des Scillas geschafft, an där et eng Rei Geschäfter ginn, grad wéi Bétons Feidt. Geplangt ass datt de Bétons Feidt plënnert, seet de Mobilitéitsminister François Bausch. Et hätt een och schonn zesumme mat Bétons Feidt een appropriéierte Site fonnt.
"Mee dat musse si elo selwer kucken, a wéi engem Phasage si dat maachen. D'Bereetschaft fir vun där Säit eppes ze maachen ass awer do, fir d'Strooss méi breet ze maachen. Dat wat mir do brauchen, eis dat ze ginn, dat ass keen Thema", sou de François Bausch.
Wunnraum, Büroen an nei Busgare
Bis elo besteet eng Konventioun mat engem Proprietär, wéinst dem Terrain, dee fir déi Aarbechten néideg ass. Mat deene Meeschte ginn et scho gutt Gespréicher, esou de François Bausch. Op deenen Terraine soll an der Héicht gebaut ginn, nieft Wunnraum sollen och Büroen entstoen.
Den Ausbau vun der Gare um Houwald ass ee weidere grousse Chantier, dee bis 2023 ganz fäerdeg soll sinn, esou de François Bausch. "D'Gare Howald selwer, den zousätzleche Quai, mat all de Gebaier uewendriwwer. Do gëtt enorm gebaut, och mat enger Busgare a sou weider. Um Houwald kënnt och eng Busgare, Richtung Héicht Bouneweg", sou de François Bausch.
Just nieft der Gare um Houwald soll och een neie Lycée, de Lycée technique du Centre, hikommen. Bâtiments publics wier am Gaangen en Avant-projet détaillé auszeschaffen. "Mir hunn eis fir déi Plaz entscheet, well de Lycée do ganz no bei enger Gare leit." Den neie Lycée dierft bis 2027 fäerdeg gebaut sinn.
De Panorama-Bäitrag vum Carole Schimmer: