Supreme Court Trump iwwerhëlt d'Kontroll vum héchste Geriicht an den USA

Wann et sollt am Joer 2020 zu enger Victoire vum Donald Trump an zu engem zweete Mandat vun him am Wäissen Haus kommen, da muss ee fir e Grond net all ze wäit sichen. Näischt ass fir konservativ Amerikaner méi wichteg wéi den amerikanesche Supreme Court. Dat héchst Geriicht am Land hellt d'Decisiounen an de gréissten Themen, déi Amerika ëmmer méi an zwee splécken.

Et war de Supreme Court, deen homosexuell Hochzäiten zum Beispill knapps offiziell gemaach hat. Et war de Supreme Court, deen d'Victoire vum George W. Bush am Joer 2000 offizialiséiert hat. A bal all de wichtegsten Decisiounen an deene leschte Joerzéngte war de Vott vum Riichter Anthony Kennedy decisiv. Hie war vun engem republikanesche President, dem Ronald Reagan, nominéiert ginn, mee huet net ëmmer mat enger konservativer Stëmm gewielt. An engem ideologesch gespléckte Geriicht goung et fir vill Affekoten drëms de Kennedy ze iwwerzeegen.

Trump kéint dat héchst Geriicht ideologesch méi no riets drécken

Mat sengem Depart Enn Juli gëtt also eng Plaz fräi. An den Donald Trump huet d'Muecht fir säi Successeur ze nominéieren. Eng Lëscht huet hie schonn. Et si gréisstendeels staark konservativ Riichter, déi zum Beispill géint d'Ofdreiwung a géint dem Obama seng Gesondheetsreform géife stëmmen, wa si da sollten d'Méiglechkeet kréien.

Den Donald Trump huet d'Chance, dat héchst Geriicht am Land nei ze definéieren, an ideologesch kloer no riets ze drécken. Et gëtt dacks geschwat iwwer engem President säin Impakt op d'Land. Nei Riichter ze nominéieren ass eng Aart a Weis fir den Trump, an d'Geschichtsbicher ageschriwwen ze ginn.

Trump kéint seng Legitimatioun ënner de Republikaner stäerken

Wann d'Fro déi nächste Kéier opkënnt, firwat den Trump esou beléift ass bei senge Supporter a firwat net méi Republikaner hie kritiséieren, dann ass d'Äntwert elo nach méi kloer. E Geriicht, dat méiglecherweis Joerzéngte laang konservativ wäert stëmmen ass derwäert, och fir déi Republikaner, déi sech theoretesch vum amerikanesche President senge Wierder, sengem Toun, a sengen Aktioune wëllen distanzéieren. Mam Remplaçant vum Anthony Kennedy kënnt schonn deen zweete Riichter vum Supreme Court vun enger Lëscht vum Donald Trump. Seng Kandidate wäerten Amerika a seng Gesetzer nei definéieren.