Politesche Wocheréckbléck Ugespaante Situatioun bei der LSAP, Erneierung bei der CSV

D'Regierung steet, d'CSV ass am Gaange sech ze erneieren an d'Chamber ass nees komplett: Dës Woch ass vill geschitt an der Politik. Wéi si verschidden Entwécklungen ze analyséieren? Erklärunge vum 100,7-Chefredakter Jean-Claude Franck.

Jean-Claude Franck / cz / cbi

Analys Jean-Claude Franck
Den 100,7-Chefredakter Jean-Claude Franck mam Wocheréckbléck. Foto: Archiv.

D'Gremie vun DP, LSAP an déi gréng hunn den Dënschdeg mat grousser Majoritéit gréng Luucht fir eng nei Oplag vun der Dräierkoalitioun ginn. Um LSAP-Kongress gouf et vill Kritik, trotzdeem hu just 13 vu 400 Delegéierter géint de Regierungsprogramm gestëmmt. Wéi ass dat ze deiten?

Et weist, datt d'Kritik sech op just nach e klengen Deel an der Partei limitéiert. D'Kritik ass zwar haart, an deels schaarf, mee et sinn der net vill, déi sech uschléissen. D'Erklärung dofir ass, datt dee méi kritesche lénke Fligel net méi sou grouss ass, wéi en dat mol war. Et weist och, datt e puer Leit an de Medie vill Opmierksamkeet kënne kréien, mee datt déi Kritik net onbedéngt representativ ass.

Wann d'LSAP net an d'Regierung komm wier, dann hätt d'Partei manner Suen zur Verfügung an et géife sech manner Carrièresméigkechkeete fir verschidde Leit bidden. Do hänkt vill dorun. Do hält den Idealismus da séier op.

Bei der LSAP war d'Stëmmung während de Koalitiounsverhandlungen trotzdeem phaseweis schwiereg?

Intern war d'Stëmmung net ëmmer gutt, jo. Mir erënneren eis: Den Etienne Schneider wollt een Ament EU-Kommissär ginn an net méi an d'Regierung goen. Dat heescht de Spëtzekandidat, a Verhandlungsleader, wollt sech duerch d'Bascht maachen. Dat ass een Zeechen, datt d'Situatioun ugespaant war.

Den Haaptproblem vun der LSAP ass d'Erneierung: Wie mécht Plaz fir nei Gesiichter? An der LSAP gëtt et vill laangjäreg Politiker, déi och gutt perséinlech Wahlresultater haten, mee den Etienne Schneider hat e manner gutt Resultat am Zentrum, seng Positioun ass geschwächt.

Bei der DP a bei déi gréng goufen et manner Tensioune während de Verhandlungen, oder?

Jo, ganz kloer. D'DP gëtt manner basisdemokratesch gefouert, do decidéieren e puer Leit ganz vill, an da ginn et an esou Situatiounen och manner Reiwereien. De Comité directeur huet den Dënschdeg eestëmmeg fir d'Regierungsequipe a fir de Regierungsprogramm gestëmmt.

Bei de Grénge gëtt et nach ëmmer eng Euphorie wéinst dem gudde Wahlresultat vum 14. Oktober. Mat hire fënnef Regierungsmembere waren d'Poste séier intern verdeelt, d'Opdeelung Fraen a Männer huet gestëmmt, an d'Bezierker sinn all representéiert, sou datt et do wéineg Diskussioune goufen.

Bei der LSAP sollen d'Gremien am Januar ganz erneiert ginn. Bei der CSV ass den Erneierungsprozess awer elo och voll am Gaang?

D'Martine Hansen ass elo Fraktiounscheffin vun der CSV, an net méi de Claude Wiseler. Domadder gouf eng wichteg Personaldecisioun geholl.

Déi nächst Personaldecisioun ass déi vum Parteipresident. Do leeft et op e Match tëschent dem Frank Engel an dem Serge Wilmes eraus. De Luc Frieden huet confirméiert, datt hien net kandidéiert. De Marc Spautz trëtt och net méi un. Weider Kandidature sinn net bekannt. De Serge Wilmes huet allerdéngs och nach net kloer ëffentlech gesot, datt hie kandidéiert. Bis den 9. Januar kënnen d'Kandidaturen iwwregens agereecht ginn. Do ass dat lescht Wuert also nach net geschwat.

An der Mediathéik:

Lauschteren

Méi zum Thema

Claude Wiseler
Chamberwahlen 2018

De Claude Wiseler trëtt net méi als CSV-Fraktiounschef un. Hie wëll déi nächst fënnef Joer op Dossiere schaffen, déi hien interesséieren, dorënner Aussepolitik, Kultur- an Educatiounspolitik.

Serge Kesseler Réckbléck
Politesche Wocheréckbléck

Déi nei Regierung soll d'nächst Woch vum Grand-Duc vereedegt ginn. D'Verhandlunge goufen dës Woch ofgeschloss an éischt Mesurë goufe scho presentéiert. E Réckbléck mam Serge Kesseler.

De Félix Braz, den Etienne Schneider, d'Corinne Cahen an de Xavier Bettel
Koalitiounsverhandlungen

Éischt Mesuren aus dem Koalitiounsaccord goufen den Donneschdeg presentéiert. D'Ënnerschrëft ass fir e Méindeg, d'Vereedegung vun der neier Regierung fir e Mëttwoch geplangt. En Iwwerbléck vun de geplangte Moossnamen.

Jean-Claude Franck Analys
Politesche Wocheréckbléck

Ee Mount no de Chamberwahlen hëlt d'Formatioun vun der neier Regierung Form un. Et zeechent sech eng Regierung mat 17 Memberen of. Sechs Poste fir d'DP, Sechs fir d'LSAP a fënnef fir déi gréng.

Koalitiounsverhandlungen Exklusiv
Chamberwahlen 2018

DP, LSAP a Gréng wëllen hir Gremien an dräi Wochen iwwer de Koalitiounsaccord ofstëmme loossen. Dat si mir aus gutt informéierte Kreesser gewuer ginn. Den informelle Stéchdatum ass de 6. Dezember.

Koalitiounsverhandlungen
Koalitiounsverhandlungen

17 Regierungsmemberen, véier nei Gesiichter an éischt Themeberäicher, déi ofgeschloss goufen: D'Pläng vun DP, LSAP an déi gréng huele sou lues Form un. Mee si sinn nach net definitiv.

Nicolas Schmit
Koalitiounsverhandlungen

Wann d'LSAP den nächste Lëtzebuerger EU-Kommissär ka stellen, wëllt den Nicolas Schmit fir dëse Poste kandidéieren. Hie wéilt dann och LSAP-Spëtzekandidat bei den "extrem wichtegen" Europawahle ginn.

Koalitiounsverhandlungen
Chamberwahlen 2018

Déi éischt Gespréicher iwwer déi gemeinsam Zieler vun der neier Regierung ware méi kuerz wéi geplangt. Et hätt ee "relativ séier" een "zimlech breede Konsens" fonnt, seet de Chef vun der grénger Verhandlungsdelegatioun Félix Braz.

Programm

  • Notturno

  • On air

    Notturno

  • Virum Dag

  • Moies-Magazin

  • Iwwer Mëtteg

Net verpassen

  • Suicidegefor am Alter: En Tabuthema

    Suicidegefor am Alter.png

    Persounen iwwer 75 Joer si besonnesch ufälleg fir sech d'Liewen ze huelen. Eng rezent Campagne fir "Suicidepreventioun am Alter" weist, datt Seniore sech dräi bis véier Mol méi dacks suicidéiere wéi Jonker ënner 25 Joer. E puer vun de Grënn si sozial Isolatioun, Solitude oder Depressiounen.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen