Konsumenteschutz ULC presentéiert hir Fuerderunge virun de Chamberwalen
De Konsumenteschutz begréisst de rezenten Tripartite-Accord, mee et hätt ee nach méi wäit misste goen, seet de President vun der ULC Nico Hoffmann. Um Dënnste goufen virun der Presse d'Fuerderunge vum Konsumenteschutz fir d'Chamberwale presentéiert. D'Upassung vun der Steiertabelle wier ee Schrëtt deen ze begréisse wier an d'Steierpolitik misst nach fir méi Gerechtegkeet suergen.
Déi aktuell Krisen hätten Auswierkunge bis an d'Mëttelschicht an et wier wichteg d'Kafkraaft weider ze stäerken, erklärt de Nico Hoffmann. Ënner anerem fuerdert d'ULC d'Ofschafung vun der Steierklass 1A an allgemeng eng Upassung vun der Steiertabell. Ausserdeem fuerdert de Konsumenteschutz dat Steiere fir héich Revenuen an Zukunft misste klammen.
Automatesch Indexupassung
Weider Fuerderunge vun der ULC betreffen de Bankesecteur, D'Liewensmëttelsécherheet a Logementspolitik.
Déi rezent Krise gräife bis an d'Mëttelschicht, betount de Nico Hoffmann. Déi nei Moossname vum Tripartite Accord vum 4. Mäerz an och déi automateschen Indexupassung wiere wichteg, fir d'Kafkraaft ze erhalen a souguer ze stäerken.
D'Regierung hätt der ULC no awer nach méi wäit kenne goen, fir méi Steiergerechtegkeet ze schafen. D'ULC géif, trotz der schwiereger Situatioun, fuerdere keng Steiere méi um Mindestloun ze bezuelen. Et géif och eng Upassung vun de klengen a mëttlere Revenue vun der Steiertabell un d'Inflatioun virgeholl ginn.
Gesellschaft ouni Boergeld
De Konsumenteschutz fuerdert och, datt eng méi héich Besteierung vun héije Revenuen an Zukunft keen Tabu-Thema méi sollt sinn.
D'Directrice vun der ULC, Aline Rosenbaum, bedauert hirersäits, datt de Projet de Loi zu Sammel-Kloen nach net viru komm ass. Si wéilte bëssen Drock op déi politesch Parteien ausüben, well de Gesetzesentworf scho vill méi wäit fortgeschratt ass a kuerz virun der Adaptatioun steet.
Iwwerdeems warnt de Nico Hoffmann och virun enger Gesellschaft ouni Boergeld. D'ULC kritiséiert ënnert anerem dat reegelméisseg zoumaache vu Bank-Guicheten. An der Chamber ass den Dënnsten en ëffentlechen Debat iwwert eng Petitioun, déi ee Recht op illimitéiert Boergeld Bezuelung fuerdert.
Méi zum Thema
D'ULC fuerdert Mesurë géint d'Fermeture vu Bankfilialen
De Konsumenteschutz fuerdert contraignant Mesuren, déi d'Banken drun hënnere solle systematesch Agencen zouzemaachen a Bankomaten ofzebauen. Dat wier e richtege Gesellschafts-Probleem, seet déi nei Directrice vun der ULC, Aline Rosenbaum.
D'ULC kritiséiert dat neit Gesetz iwwer d'Präisgestaltung wärend de Solden
Een neit Gesetz suergt dofir, datt Verbraucher och wärend de Soldë vu reelle Promotioune profitéiere kënnen. Fir de Konsumenteschutz ULC ass dat eng Reegelung, déi zwar gutt gemengt ass, bei där awer nach vill Froen opstinn.
