National Politik Verfassungsreform: D'Regierungsparteie leenen d'CSV-Fuerderung of

Eigentlech waren d'Parteie sech eens, an trotzdem stécht d'Verfassungsreform elo an enger Sakgaass. D'CSV huet gëschter ugekënnegt, datt si déi nei Verfassung just wëllt matstëmmen, wann d'Bierger virdrun an engem Referendum iwwer verschidde Punkte vun der Reform kennen ofstëmmen. Mee d'Regierungsparteie wëlle sech net erpresse loossen. Wa béid Säite bei hirer Positioun bleiwen, da wier jorelaang fir näischt iwwer eng nei Verfassung verhandelt ginn.

Rick Mertens / Serge Kesseler / cz

Illustratioun fir Artikel iwwer Verfassungsreform
Foto: Bigstock / perhapzz

Wéi den CSV-President den Dënschdeg de Moien um kuerz no 10 virun d'Press getratt ass, war nach net kloer, datt déi jorelaang Verfassungsdebatt geschwënn eng onerwaarte Kéier géif huelen. Mee de Frank Engel hat eng Annonce dobäi, mat där déi politesch Konkurrenz net gerechent hat.

"Mir wëlle gär dem Vollek seng Meenung héieren zu enger ganzer Rei vu méiglechen an onméigleche Froen, wahlrechtsrelevanter an anerer. Doriwwer musse mir schwätzen. Dat soll also als éischte Schrëtt geschéien, éier d'Parlament sech mat der Verfassung beschäftegt."

Am Kloertext: D'CSV hätt gär e Referendum iwwer verschidde präzis Punkten, éier d'Verfassungsreform gestëmmt gëtt. Déi gréisst Oppositiounspartei ënnermauert hir Fuerderung mat enger klorer Uso. Wann der CSV hir Fuerderung sollt ofgeleent ginn, géif d'Partei de Verfassungsentworf an éischter Lecture an der Chamber net matstëmmen, sou de Frank Engel.

Alex Bodry: "Totale Broch vun der Aarbechtsweis"

An deem Fall géif d'Verfassungsreform op Äis leien - fir d'Grondgesetz ze änneren ass nämlech eng 2/3-Majoritéit an der Chamber néideg.
Den LSAP-Fraktiounschef Alex Bodry seet, et géif hien "erschrecken", datt d'CSV deenen anere Parteien en "Ultimatum" stellt. Hie schwätzt vun engem "totale Broch" vun der Aarbechtsweis, déi et während de leschte 15 Joer an der Chamber-Verfassungskommissioun ginn hätt, an där versicht gi wier, de grousse Projet Verfassungsreform am Konsens duerchzezéien a Kompromësser ze fannen.

Fir den LSAP-Fraktiounschef stelle sech elo grondsätzlech Froen. "Ech weess net, ob et nach zu enger neier Verfassung kënnt", sou den Alex Bodry. Et misst een elo driwwer schwätzen, wat dat konkret heescht.

Eugène Berger: "E richtegen Dolchstouss an de Réck vum Paul-Henri Meyers"

Och déi gréng Fraktiounscheffin huet kee Versteesdemech fir de Virstouss vun der CSV. Et géif ee sech awer net vun der CSV "erpresse loossen". Och d'Josée Lorsché ass fir eng weider Diskussioun iwwer den Accord.

Op d'Fuerderung vun der CSV anzegoen, ass och fir d'DP keng Optioun. De liberale Fraktiounschef ënnersträicht, datt déi gréisst Oppositiounspartei hir eege Glafwierdegkeet géif op d'Spill setzen. Nach am Juli d'lescht Joer wier de gemeinsamen Accord an déi weider Virgoensweis vun der CSV matgedroe ginn, seet den Eugène Berger. D'CSV géif dee Prozess elo sabotéieren. Domat géifen déi Chrëschtlech-Sozial och hir eegen Aarbecht aus der Vergaangenheet zerstéieren.

"Dat ass jo e richtegen Dolchstouss an de Réck vum Paul-Henri Meyers. Ënner him sinn deemools d'Aarbechten ugaangen. Mir hunn an der Chamber praktesch zéng Joer, wann net nach méi, dru geschafft, ganz vill ënner dem Impuls vun der CSV a vum Paul-Henri Meyers."

De Paul-Henri Meyers dréckt säi Bedaueren aus

Den CSV-Verfassungsexpert, deen an Tëschenzäit net méi an der Chamber setzt, dréckt sech selwer méi virsiichteg aus. Hie géif déi aktuell Hannergrënn net all kennen, esou de Paul-Henri Meyers. Trotzdem kéint hien nëmme schwéier novollzéien, firwat d'CSV sech net un dat hält, wat ausgemaach war. Ass hie vun der eegener Partei enttäuscht?

"Wësst der, ech hunn eng gewëss Distanz zur Politik geholl. Enttäuscht sinn ech net, mee et deet mir awer Leed, datt ee sou laang un eppes geschafft huet, wou een elo op eemol gesäit, datt et awer näischt soll ginn, wou et quasiment fäerdeg ass."

An der Mediathéik:

Aktuelles / / Rick Mertens
Lauschteren

Méi zum Thema

Alex Bodry
Reform vun der Verfassung

De President vun der Chamberkommissioun fir d'Verfassungsrevisioun, den Alex Bodry, kritiséiert a bedauert, datt et een totale Broch mat der Aarbechtsweis am Konsens aus de leschte méi wéi 15 Joer géif ginn.

Wahlbüro
Diskussiounen iwwer neit Wahlgesetz

Nieft der LSAP, schwätzen och déi gréng an d'Pirate sech fir een eenzege Wahlbezierk aus. Dat confirméieren déi zwou Parteien eis op Nofro hin. D'DP wëllt iwwerdeems nach keng Positioun bezéien.

Alex Bodry-3
Kontext Verfassungsreform

Hannergrond fir d'Fuerderung vun engem Wahlbezierk ass e Bréif vum Premierminister en vue vun enger Reform vum Wahlgesetz. D'Parteie sollten dem Xavier Bettel bis gëschter hir Positioun zu dësem an aneren Theme matdeelen.

Claude Wiseler
Verfassungsrevisioun

D'CSV wëllt d'Prozedur fir eng nei Verfassung begleeden an ënnerstëtzen, egal ob d'Partei no de Chamberwahlen an der Majoritéit oder an der Oppositioun ass. Dat seet de Spëtzekandidat Claude Wiseler.

Simone Beissel
Verfassungsrevisioun

Et géif si wonneren, wann d'DP vum Referendum iwwer déi geplangten nei Verfassung géif ofgesinn, seet d'Simone Beissel. D'Populatioun misst minimum sechs Méint am Virfeld informéiert ginn.

Bodry-Meyers
Verfassungsreform

Déi nei Verfassung wäert fréistens Mëtt 2020 a Kraaft trieden, mengt den LSAP-Deputéierten Alex Bodry. Den Nach-CSV-Verfassungspiecher Paul-Henri Meyers ass perséinlech géint de Referendum.

Paul-Henri Meyers
Verfassungsrevisioun

De Paul-Henri Meyers geet dovun aus, datt ee sech nach virun der grousser Vakanz iwwer de Verfassungstext wäert eens ginn. Deen Text soll dann an der neier Legislatur gestëmmt ginn.

Programm

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen