D'Formatioune fir d'Enseignanten op dat neit Fach ze preparéieren, wieren "enorm besicht gewiescht," sou de Lex Delles. Zu gewëssenen Zäiten hätten esou vill Leit sech fir d'Formatioune wëllen umellen, datt de Server beim Ministère ofgestierzt ass.
Dräi Optioune fir fréier Reliounsenseignanten
"Vie et Société" ka souwuel vun normale Grondschoul-Enseignante gehale ginn, wéi och vun Enseignanten, déi bis elo Reliounscourse ginn hunn. Fréier Reliounsenseignante kréien nämlech d'Méiglechkeet, als Chargé Coursen an der Grondschoul ze halen, wa si e Premières- oder Treizièmesdiplom hunn. Vun de ronn 200 Reliounsenseignanten an der Grondschoul wieren der eng 70 an där Situatioun, sou de Lex Delles. Si kënne Chargé de Cours ginn, wa si eng zousätzlech Formatioun vun 150 Stonnen maachen.
Fir Reliounsenseignanten, déi keng Première hunn, ginn et zwou weider Optiounen, fir sech ze reorientéieren. Si kënnen als Hëllefskraaft am Enseignement engagéiert ginn, zum Beispill an der Education Différenciée, der Logopedie oder a verschidde Lycéeën. Donieft finanzéiert de Ministère och 40 voll Tâche beim Bistum, fir Reliounscourse baussent der Schoul z'organiséieren.
Kritescht Denke soll am Mëttelpunkt stoen
An der Grondschoul orientéiert "Vie et Société" sech un deem selwechte Kaderprogramm wéi an de Lycéeën, wou d'Fach schonn am September 2016 agefouert gouf. Haaptzil vum Cours wier et, de Schüler bäizebréngen, "Saache kritesch ze hannerfroen," sou de Lex Delles. Dobäi géif et kee "richteg oder falsch" ginn, mä et sollen "iwwergräifend" Themen, wéi d'Mënscherechter oder déi grouss Weltreliounen, opgegraff ginn.