Fir de Krich an der Ukrain Wéi Lëtzebuerg der Ukrain déi Waffe liwwert, déi se brauch

Och Lëtzebuerg ënnerstëtzt d'Ukrain mat Waffen a Munitioun. Well eis Arméi awer relativ séier alles ginn hat, wat se entbiere konnt, ass d'Lëtzebuerger Defense en eegene Wee gaangen, fir u Material ze kommen. Eng kreativ Léisung, déi déi renomméiert US-amerikanesch Dageszeitung New York Times d'lescht Woch verroden huet.

Maurice Molitor / cz

Waffen
Foto: unsplash / Mykola Makhlai

Zwee Mataarbechter mat militäreschem Background wiere mat der Iddi komm, fir op de fräie Marché akafen ze goen. Deen ee vun hinnen hätt do, an der Vergaangenheet och schonn Erfarung gesammelt gehat. D'Iddi wier aus der Nout eraus gebuer ginn, scho kuerz nom Ufank vum Krich, well Lëtzebuerg weider hätt wëllen hëllefen, och wéi déi eege Stocken, vun deem wat konnt geliwwert ginn, eidel waren. An et gouf dee Moment keng Alternativ a Form zum Beispill vun engem Dëppen, an dat een hätt kënnen abezuele fir gemeinsam mat aneren akafen ze goen. Dofir den eegene Wee.

Lëtzebuer hätt ëmmer geziilt akaaft an en fonction vun deem wat gebraucht gëtt. Et wier een a permanentem Kontakt mat der ukrainescher Ambassade zu Bréissel gewiescht an et hätt een déi Saache vun enger Lëscht kaaft, déi d'Ukrain gebraucht huet, seet de François Bausch.

"Mee mir krute gesot iwwer eng Lëscht, hei mir bräichten 100 Night Goggles, där Nuechtsiichtgeräter, an dann hu mer versicht déi ze kafen. Oder: Mir brauchen elo esou vill dausend Schoss där Munitioun, da si mer déi kafe gaangen."

Lëtzebuerg huet 2023 scho fir 15 Milliounen Euro Waffe fir d'Ukrain kaaft

Grouss Gefierer wiere keng kaaft ginn: "Do hu mer net genuch Experienz", seet de François Bausch. Mee Munitioun a méi kleng Ekipementer, dat hätten déi zwee Mataarbechter vun der Lëtzebuerger Defense kënnen opdreiwen. An hir Missioun ass och nach net eriwwer.

"Si sinn nach ëmmer aktiv, well mir hu bis elo dëst Joer (2023) jo schonn erëm fir 15 Milliounen akaaft, an de Gros misst och scho geliwwert sinn. A mir fuere weider, wéi mer et och versprach hunn, esou laang wéi et noutwenneg ass."

De Wee vun de Waffen ass strikt kontrolléiert

Akaaft gëtt net op iergend engem Schwaarzmaart, mee bei etabléierte Firmen. Lëtzebuerg bekëmmert sech och ëm de logistesche Volet, organiséiert also den Transport vun de Saache bis un d'ukrainesch Grenz, ma kee Schrëtt weider. Do huelen d'Ukrainer d'Material dann entgéint a bréngen et dohin, wou et gebraucht gëtt.

D'USA hätten "relativ strikt" Conditioune gesat fir de Wee vun de Waffe kënnen nozevollzéien, fir ze verhënneren, datt Waffen iwwer aner Weeër géife verkaaft ginn.

"D'Leit musse sech net virstellen, datt do einfach jiddweree Këschteweis akafe geet, déi iergendwou hi liwwert an dann hellt do iergend een déi of, an da mécht en domat wat e wëll. Also esou ass dat net an der Praxis."

D'Identitéit vun den zwee Mataarbechter aus der Défense gëtt aus Sécherheetsgrënn iwwregens geheim gehalen. De François Bausch hält de Risiko, deem si ausgesat sinn, awer fir "mesurabel".

An der Mediathéik:

Aktuelles / / Maurice Molitor
Lauschteren

Méi zum Thema

Josep Borrell
RUSSESCHE KRICH AN DER UKRAIN

D'EU-Länner sollen hir Stocken unzapen, freet den EU-Chef-Diplomat Josep Borrel. Och de gemeinsamen Akaf vu Munitioun, änlech ewéi bei den Impfstoffer, ass an der Diskussioun.

Arméi
Krich

Fir den Ukrainer an dem Krich géint Russland ze hëllefen, liwwert Lëtzebuerg Instrumenter fir Krichsverbriechen opzeklären. Dorënner sinn 30 3D-Scanneren, déi Krichsverbrieche kënnen dokumentéieren.

Net verpassen

Programm

Dossieren

  • Gemengewalen 2023

    Den 11. Juni gëtt an de verschiddene Gemenge vum Land en neie Gemengerot gewielt. Wéi eng Sujete dominéieren d'Wal a wéi verleeft de Walkampf an de vereenzelte Gemengen?

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen