Projete wéi d'Gare ënnert de Rouder Bréck géife genausou zu der Léisung vum Verkéiersproblem bäidroen, erkläert den Alain Weins. Virun allem soll de Réckbau awer och eng Moossnahm si fir d'Liewensqualitéit zu Walfer ze erhéijen, esou d'DP Buergermeeschtesch Joelle Elvinger. Méi breet Trottoire fir déi Leit, déi op der Haaptstrooss wunnen an d'Gemengeplaz als e gréngen Duerfzentrum sollen eng Plus-value fir d'Gemeng ginn.
Edupol belieft d'Walfer Duerfliewen
Fir datt duerch de Projet awer keng Parkplazen am Duerfzentrum verluer ginn, soll an Zukunft e grousst Parkhaus mat 400 Parkplazen entsoen. Bei der Gemengeplaz, déi zum Gros gréng gemaach gëtt, géife puer Parkplaze fir Persoune mat reduzéierter Mobilitéit bleiwen. Déi aner bestoend Parkplaze géife verlagert ginn, esou den LSAP-Schäffen Alain Weins. "Gläichzäiteg wësse mir, datt duerch den Edupol ganz vill Leit mam Auto musse pendelen."
Fir d'DP-Buergermeeschtesch belieft den Edupol d'Walfer Duerfliewen a bréngt de Commercen Clienten. Si gëtt zou, datt d'Parkhaus net onbedéngt géint de villen Trafic zu Walfer hëlleft. D'Parkplaze wiere virun allem awer fir d'Awunner vu Walfer geduecht.
Walfer wéinst Bautepolitik kritiséiert
D'Iddi vum Contournement Biergerkräiz, deen am Koalitiounsprogramm virgesinn ass, géif den Ament net vun der Regierung ënnerstëtzt ginn. D'Majoritéit vun der Gemeng Walfer gouf an de leschte Jore virun allem wéinst hirer Bautepolitik kritiséiert. Präzis geet et do ëm d'Konzept vun engem grousse Komplex fir Wunnengen tëscht der Route de Luxembourg an der Rue de Steinsel.
De PAP wier dem Joelle Elvinger no awer gestëmmt a vum Ministère approuvéiert ginn. "Deen ass konforme zum PAG. Et ass alles legal ofgelaf. Dee Projet war jo aviséiert gi vu sämtlechen Experten an de Verwaltungen an dee gëtt elo iergendwann eng Kéier gebaut, wann de Promoteur d'Baugenehmegung ufreet."
D'Oppositiounsparteien CSV an déi Gréng wollten iwwerdeems net an de Face-à-Face um Radio kommen.