De soziale Mindestloun gëtt all zwee Joer gesetzlech op Grond vun der genereller Lounentwéckelung no uewen ugepasst, a gouf deemno elo ëm 3,2% gehéicht. Net-Qualifizéierter verdéngen elo mam soziale Mindestloun 2.387,40 Euro Brutto de Mount - ronn 74 Euro méi wéi virdrun.
Verschidde Primmen gi bäibehal
Fir Qualizéierter läit de soziale Mindestloun elo bei 2.864,88 Euro de Mount - e Plus vun 88,83 Euro. D'Hausse vun 3,2% gëllt och fir de REVIS - de Revenu d'Inclusioun Sociale; a fir den RPGH - de Revenu fir Persoune mat engem graven Handicap. Och d'Pensioune goungen um 1. Januar erop - ëm 2,2%.
D'Allocation de vie chère grad ewéi d'Energieprimm, ginn 2023 bäibehalen.
Baisse bei der TVA
Bei der TVA gouf et op den 1. Januar eng Baisse - esou wéi et an der leschter Tripartite decidéiert gi war. Dee normalen Taux, dee fir déi mëscht Produitë gëllt, goung vu 17 op 16% erof, den taux intermediaire vu 14 op 13%, an de reduzéierten TVA-Taux geet vun 8 op 7% erof. Déi 7% TVA gëllen elo och zum Beispill fir d'Reparatioun vun Haushaltsapparater a fir d'Vente vun Elektro-Vëloen.
Fir d'Leit bei den Energiepräisser ze entlaaschten sinn d'Stroumpräisser fir Privatleit den 1. Januar automatesch un de Niveau vu zejoert agefruer ginn. De Präisdeckel um Gas an d'Subventioun fir de Mazout gi bis d'Enn vum Joer verlängert.
D'CO2-Steier, déi zanter 2021 a Kraaft ass, gouf wéi virgesinn, ëm 5 Euro no uewen ugepasst, a läit elo bei 30 Euro pro Tonn CO2.
Fir franséisch Frontalieren, déi zu Lëtzebuerg schaffen, ass um 1. Januar och eng Ännerungen a Kraaft getrueden: Si kënnen elo 34 Deeg laang am Teletravail schaffen ouni a Frankräich besteiert ze ginn - dat sinn 5 Deeg méi wéi virdrun.
