Héichwaasser Wat maachen nom Schued?

An deene Regiounen, wou et d'lescht Woch Iwwerschwemmunge gouf, gëtt zum Deel nach ëmmer opgeraumt. Déi betraffe Leit sollen sech elo bei hirer Assurance mellen, fir z'evaluéieren, wéi se kënne rembourséiert ginn. Donieft gouf e Freideg jo och ugekënnegt, datt d'Regierung 30 Milliounen Euro bereet stellt, fir deene Leit ënnert d'Äerm ze gräifen, déi vill Schied hunn.

Betty Gillen / cbi

Futtis Autoen

Fir dës Hëllef ze kréien, géif engersäits evaluéiert ginn, wat d'Assurance vun de Privatpersounen souwisou schonn iwwerhuelen, heescht et vum Familljeministère. Duerno géif de Montant vun der Hëllef vun der Gréisst vum Schued a vun der finanzieller Situatioun vun der betraffener Persoun ofhänken. Et wier allerdéngs nach ze fréi fir ze soe, wéi vill Leit sech do géife mellen.

Sech direkt beim Assureur mellen

An och d'Entreprisë sollen sech an enger éischter Etapp un den Assureur wenden. D'Aide kéint deen Deel ersetzen, deen net vun der Assurance iwwerholl gëtt, sou heescht et um Wirtschaftsministère. Et kéint ee sech zum Beispill mat Fotoe vum Schued un den Assureur wenden, seet de Marc Hengen, Direkter vum Versécherungsverband ACA.

Et sollt een dat am Allgemengen esou séier wéi méiglech beim Assureur mellen, deen och Instruktiounen an Indikatiounen iwwer de weideren Oflaf kéint ginn. "An dee gëtt dann och d'Méiglechkeet, fir sou séier wéi méiglech en Expert oder en Inspekter op d'Plaz ze schécken, fir datt sou séier wéi méiglech gefléckt, geraumt a gebotzt ka ginn."

Vill Schued an de Gemengen

An der Gemeng Bäerdref sinn eng Dosen Stéit betraff, sou de Bäerdrefer Buergermeeschter Joé Nilles. Do géif et haaptsächlech em Elektroschued goen. An der Garage um Grondhaff misst dogéint nach während enger Woch geraumt ginn. Den Hotel Le Cigalon am Mëllerdall wäert viraussiichtlech dëst Joer net méi opgoen.

An och méi am Süde vum Land, zu Greiweldeng, goufen et staark Iwwerschwemmungen. Do hat d'Gemeng direkt den Oftransport vun deene futtisse Saachen organiséiert, erzielt d'Marie Thérèse Sibenaler vun der asbl Greiweldenger Leit. Ënnen am Duerf war d'Waasser an de Keller vun engem Haus vun der asbl gelaf, wou Vakanzewunnengen dra sinn.

Et wier een elo am gaangen no enger Noutléisung ze siche, fir datt ee waarm Waasser huet, sou nach d'Marie Thérèse Sibenaler. Fir de Rescht stinn déi betraffe Leit elo am Kontakt mat hiren Assurancen. D'Demande fir Privatpersoune kann een nach bis den 30. Juli iwwert de Site vum Familljeministère era reechen.


D'Betty Gillen am Panorama de 4. Juni um 12 Auer:

Lauschteren

Méi zum Thema

Iwwerschwemmungen
Héichwaasser 1. Juni 2018

Wéinst dem ville Reen an der Nuecht vun Donneschdeg op e Freideg, virun allem am Mëllerdall, ass d'Krisen-Zell vum Haut Commissariat à la protection nationale aktivéiert ginn. Een Iwwerbléck, Hannergrondinformatiounen a Reaktiounen.

Programm

Dossieren

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Dateschutz

    De 25. Mee trëtt an der EU en neit Dateschutzreglement a Kraaft. Wat bedeit dat fir d'Bierger an d'Betriber? A wat ännert wierklech? Detailer an eisem Themeschwéierpunkt.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen