D'Wirtschaftssituatioun vu Lëtzebuerg ass nach ëmmer ganz favorabel och wann d'Wuesstemsprognosen no ënne revidéiert goufen, seet de Statec-Direkter Serge Allegrezza. Dat hätt hien uganks der Woch och den dräi Parteien DP, LSAP an déi gréng erkläert, déi hir Koalitiounsverhandlunge preparéieren. D'Konjunktur wier international rezent nees méi schwaach gewiescht, an dowéinst misst ee sech op Revirementer astellen.
"Schwaach Konjunktur am Kapp behalen"
Ob de politeschen Handlungsspillraum dowéinst manner grouss ass, ewéi déi lescht fënnef Joer, wier schwéier ze soen, esou de Serge Allegrezza. Mee et misst een déi Zeenarien bedenken. "Ech huelen un, datt déi Leit, déi d'Koalitioun elo preparéieren, dat natierlech och am Kapp hunn." D'Statistikverwaltung géif deene Betraffenen och nach eng Rei Saachen noliwweren.
"Mee op der anerer Säit, dierf een net iwwerdreiwen. De Lëtzebuerger Staat huet momentan een Iwwerschoss vun zwee Prozent vum PIB. Dat ass ganz vill am Verglach mat anere Länner. Et ass deen héchsten." Et wier also Spillraum do, "fir allerhand Saachen z'ënnerhuelen", esou de Serge Allegrezza,
"Scholde maache fir an Infrastrukturen z'investéieren"
D'Situatioun vun de Staatsfinanze wier exzellent. An d'Verschëldung vum Staat wier dem Statec-Direkter no net grouss genuch. Den Emprunt wier extrem bëlleg. An een Emprunt géif ee fir Investissementer fir Infrastrukture benotzen.
"Infrastrukturen, déi daueren op d'mannst zwou Generatiounen. Dat erlaabt engem eng intergenerationell Equitéit - well och eis Kanner solle matbezuele fir d'Stroossen, déi si benotzen - an et erhéicht d'Potential vun engem Land."
Nei Staatsscholde maache wier legitim fir an Infrastrukturen z'investéieren, esou de Serge Allegrezza. "An ech sinn der Meenung, datt mam Bevëlkerungswuesstem - wa mir dorunner gleewen, datt mir op eng Millioun (Awunner) kommen - musse mir massiv investéieren."
Referenz-Budget
Den Aarmutsrisiko zu Lëtzebuerg klëmmt an déi nächst Regierung muss dogéint méi ënnerhuelen. Zu där Konklusioun ass de Statec rezent am Rapport iwwer d'sozial Kohäsioun hei am Land komm. De Statec-Direkter Serge Allegrezza plaidéiert fir an der Debatt iwwert d'Sozialpolitik mat engem sougenannte "Referenz-Budget" ze schaffen, dee festleet, wéi eng Moyenen ee Stot brauch, fir hei am Land dezent ze liewen. Fir eng Koppel mat zwee Kanner wieren dat ëm déi 4000 Euro de Mount. Dat wier ee konkreten Unhaltspunkt, deen d'Leit géife verstoen an iwwert deen een eng Diskussioun kéint féieren, esou de Serge Allegrezza.
"Déi 4000 Euro- oder déi Gidder a Servicer, déi do ofgedeckt sinn - geet dat wierklech duer? Ass dat ze vill? Ass dat ze maachen? Do kann och een och eng Debatt hunn, déi net esou abstrakt ass, wéi wann ech de Leit erklären, datt de seuil de pauvreté bei 60 Prozent vum revenu médian läit. Dat verstinn déi Allermannsten. Ech verstinn och, datt een domadder Schwieregkeeten huet." D'Approche vum Referenz-Budget wier vill méi einfach z'erklären, esou de Statec-Direkter.