Parteipolitik Wéi ee Renouveau fir d'LSAP?

D'LSAP wëllt sech erneieren. Den Owend bestëmmt den LSAP-Kongress een neie Parteipresident a Generalsekretär. Déi zwee wichtegst Responsabilitéitsposten, fir déi et awer wéineg Interessi gëtt.

Maxi Pesch / cbi

LSAP-Wahlkongress, Juli 2018
Den LSAP-Wahlkongress am Juli 2018. Foto: LSAP / Archiv.

Fir de Poste vum neie Generalsekretär ass den OGBL-Zentralsekretär a Buergermeeschter vu Réiser Tom Jungen den eenzege Kandidat. Niewent dem 42 Joer jonke Politiker wier wéineg Interessi un dësem Poste gewiescht, heescht et aus der Partei.

Och fir de Poste vum Parteipresident gouf et wéineg Interessi. Fir de Claude Haagen z'ersetze kandidéiert just den LSAP-Deputéierten a Geschäftsaffekot Franz Fayot.

Politikverdrossenheet a Generatiounsproblem

Et ware virun allem de lénke Fligel an d'Jongsozialisten, déi sech ëmmer nees agesat hate fir d'Erneierung vun der Partei virunzedreiwen. Datt elo kee vun de Jonken un engem Responsabilitéitsposten interesséiert wier, géif dem neie JSL-President Georges Sold no un enger Politikverdrossenheet an un engem Generatiounsproblem leien.

"Mir hunn e Problem mam Nowuess. Do gouf kee Nowuess geschafen a kee rekrutéiert. An déi jonk goufen net aktiv mat agebonnen. Dat heescht, mir hunn elo vill al Leit a quasi keen, dee souwuel Erfarung, wéi och Loscht huet, déi Erneierung unzedreiwen."

Net vill Kandidature vu Fraen

Niewent der Politikverdrossenheet vun de Jonke bedauert den Nico Wennmacher, datt keng Frae sech fir de Poste vum Parteipresident respektiv dee vum Generalsekretär gemellt hätten. Eenzeg Kandidatinne sinn d'Paulette Lenert fir de Poste vun der Vizepresidentin an d'Christine Schweich als Tresorière.

Bannent der LSAP wier dem LSAP-Politiker no an dësem Beräich nach vill Aarbecht ze leeschten, besonnesch fir Jonker a Fraen ze motivéiere fir matzeschaffen. "D'Féierungsequipe hätt als Missioun, fir dat alles an d'Weeër ze leeden."

Och Iddie mussen Deel vun Erneierung sinn

Dat soll an dësem Fall de Franz Fayot sinn. Scho virun engem Joer hat den LSAP-Deputéierten an engem Oppene Bréif fir d'Erneierung vun der Parteispëtzt plädéiert. De fréiere Generalsekretär Yves Cruchten seet, datt de Franz Fayot sech vill investéiert huet. "Hien huet sech Gedanke gemaach wou d'Partei soll higoen, mee den Erneierungsprozess kann net nëmmen um Personal hänken."

Fir den Yves Cruchten ass et wichteg, datt och Iddien Deel vun dësem Prozess sinn. "Dat wat mir wëllen no bausse verkierperen." Doru misst geschafft ginn, an de Franz Fayot wier do op der richteger Plaz.

Vill Kandidature fir d'Parteileedung

Niewent de Poste vum President, Generalsekretär, Vizepresident a Vizepresidentin an Tresorier soll och eng nei Parteileedung gewielt ginn. Do hätten dës Kéier ongewéinlech vill Kandidate sech gemellt, erkläert den Yves Cruchten. Et géif 46 Kandidature fir 10 Poste ginn, vill dovunner wiere Jonker an iwwer een Drëttel dovunner wiere Fraen.

Um LSAP-Kongress den Owend zu Käerjeng wëllt d'Partei sech op alle Posten erneieren. Den Erneierungsprozess schéngt domadder awer nach net ofgeschloss.

An der Mediathéik:

Aktuelles / / Maxi Pesch
Lauschteren

Méi zum Thema

Franz Fayot a Félix Eischen
CSV an LSAP

Bei der CSV kandidéiert de Felix Eischen fir de Poste vum neien CSV Generalsekretär. Bei der LSAP wier den Deputéierte Franz Fayot drun interesséiert fir Parteipresident ze ginn.

Sammy Wagner
Chamberwahlen 2018

Den LSAP-Parteipresident an den LSAP-Generalsekretär missten aus dem Wahlechec vun de Sozialiste Konsequenzen zéien. Dat fuerdert de Sammy Wagner, den LSAP-Schäffe vu Stengefort.

Claude Haagen
Gemengewahlen

Et wier en "nationalen Trend", datt d'CSV vill Lëschtestëmme géif kréien, seet den LSAP-Parteipresident Claude Haagen. D'LSAP huet just nach an dräi Gemengen eng absolut Majoritéit.

Programm

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Festival de Cannes 2019

    Alleguer d'Artikele vum Festival de Cannes 2019.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen