Fräie Mikro Wéi eng Jugendhëllef brauche mir?

Zanter bal 20 Joer soll d'Gesetz iwwer de Jugendschutz reforméiert ginn. De Projet, deen am Mäerz 2018 presentéiert gouf, war mat groussen Hoffnungen erwaart ginn, déi awer enttäuscht goufen. E Fräie Mikro vum Frank Wies.

Frank Wies / cz

Meenung Frank Wies
Frank Wies

Jugendhëllef ass net einfach partiellen oder totalen Entzuch aus dem Elterenhaus, esou wéi d'Gesetz et hei virgesäit. Jugendhëllef heescht u sech offensiv sozial-pädagogesch Strategien entwerfen, déi an éischter Linn de virdrugenannten Entzuch am héchste Mooss géife verhënneren. Jugendhëllef a -schutz gehéieren an enger moderner Legislatioun an de Beräich vun der primärer Präventioun an net, wéi et hei virgesinn ass, an de Beräich vun enger tertiärer, ënner dem Motto: "D'Kand läit am Bur, loosse mir et an en anere Bur verleeën." Dës Wierder sinn den 14. Mäerz 1984 vum sozialisteschen Deputéierte Benny Berg an der Chamber als Kritik gefall, géint de Projet de loi, deen dem aktuelle Gesetz iwwer de Jugendschutz zu Grond louch.

Si sinn och haut, 35 Joer méi spéit, nach ëmmer aktuell. Zanter enger gefillter Éiwegkeet ginn d'Lacunne vun der aktueller Gesetzgebung ervirgehuewen a Verbesserunge versprach.

Schonn am August 1999 hat déi deemoleg Regierung hire Wëllen erkläert, eng Reform an d'Weeër ze leeën. Am Juni 2004 gouf dunn e Projet presentéiert. Bis zum Regierungswiessel 2013 ass dësen Text awer net wierklech vum Fleck komm a gouf dunn zanter 2015 vun engem Aarbechtsgrupp iwwerschafft an am Mäerz 2018 hunn d'Ministere Braz a Meisch der Ëffentlechkeet d'Resultat vun dëser laanger Aarbecht presentéiert.

De Staatsrot kritiséiert d'Approche vum geplangte Gesetz

Haut, ee Joer méi spéit, ass vum Enthusiasmus an der Zefriddenheet, déi di zwee Ministeren deemols gewisen hunn, net méi vill iwwreg bliwwen. Esou huet de Staatsrot net manner wéi ronn 20 Oppositions formelles a sengem Avis am Januar vun dësem Joer ugeféiert. Méi generell huet e festgestallt, datt net wierklech reforméiert gouf, mee am Allgemengen d'Approche vum alen Text, déi de Benny Berg schonn 1984 esou treffend kritiséiert hat, bäibehale gouf. De Staatsrot nennt dat den Unilateralismus a viséiert domadder haaptsächlech d'Aart a Weis an där d'Jugendriichter hir Decisiounen huelen. Dat geschitt dacks am "stillen Kämmerlein" a gëtt de betraffene Famille bei engem Placement vun der Police matgedeelt, wann déi dat betraffent Kand siche kommen.

Zwar hunn d'Auteure probéiert, de sëlleche Kritiken un der Approche Rechnung ze droen, an deem si eng Consultatioun vun de Famillen am Virfeld vun enger Decisioun virgesinn hunn. Ouni konkret Mesurë fir dëse Prinzip ëmzesetzen, bleift et awer bei enger frommer Absichtserklärung.

Jugendschutz ass kee Jugendstrofrecht

Well et ass net gelonge fir iwwer de Schied vun der Approche vun 1992 ze sprangen. D'Auteure vum Projet verstoppen dat iwwregens och net. Am Exposé des motifs präziséiere si, datt déi sougenannten "Approche protectionnelle" bäibehale gouf.

Dës hätt hier Virdeeler, well si flexibel wier an et kéint een an engem selwechten Text de Schutz an d'Bestrofung vun deene Mannerjärege behandelen. Mee genau dora leit de ganze Widdersproch vun eiser Gesetzgebung. Si nennt sech "protectionnelle", et gëtt präziséiert, datt kee Strofrecht fir Mineure soll agefouert ginn, an awer strotzt den Text vu Strofmosmesuren déi kënne geholl ginn. Dës gi vun enger mëndlecher Verwarnung bis hin zu dem Placement am Centre socio-éducatif de l'État, allgemeng als Dräibur bekannt.

Dës Strofmesurë kënne geholl ginn, wann de Mineur eppes verbrach huet, wat fir en Erwuessenen als Strofdot gëllt. Während dem Brigang vun iwwer 18 Joer awer eng ganz Rei Rechter garantéiert ginn. Soll dat net fir Kanner gëllen? Firwat soll zum Beispill e Jugendlechen net wëssen, fir wéi laang hie seng Fraïheet geholl kritt, während den Erwuessenen dat muss a sengem Uerteel mat gedeelt kréien?

Dat ass keng Fro vun néideger Flexibilitéit vun de Mesuren déi de Jugendriichter kéint huelen, mee ganz einfach en elementaart Recht wat een, "Approche protectionnelle hin oder hier ", Kanner net ka refuséieren. Virun allem wann een, wéi och dës Regierung, der Meenung ass, datt Mannerjäreger a leschter Instanz nach ëmmer kéinten an e Prisong agespaart ginn.

Et feelt un Alternativen an u Präventioun

Entweder et wëll een eleng Jugendschutz maachen, dann awer ouni esou exorbitant Strofmesuren, oder awer et respektéiert een déi fundamental Rechter an et mécht een e richtegt Strofrecht fir Mannerjäreger.

An dat wat de Benny Berg 1984 zu der Philosophie vum ale Jugendschutz gesot huet gëllt leider och fir den néie Projet. Eréischt wann d'Kand am Buer läit soll de Jugendriichter et riichten. Wou si Präventioun, wou sinn Alternative fir zum Beispill Famillen ze hëllefen am Virfeld eng Eskalatioun vu Situatiounen ze vermeiden?

Et wéilt een deene Verantwortlechen am léifsten zouruffen: traut iech dach eng richteg Reform ze maachen! Eng wou ee gesäit datt eng Philosophie hannendru stécht, mat klore Linnen a Rechter, déi präzis formuléiert sinn. Well wann den aktuelle Projet an dëser Form zum Gesetz gëtt, dann doktere mer och déi nächst 30 Joer nach un enger Jugendhëllef déi den Numm och verdéngt.


Mam Zil, déi ëffentlech Debatt ze fërderen, invitéiert de radio 100,7 am Fräie Mikro Leit aus der Zivilgesellschaft fir aktuell Themen ze kommentéieren. De Fräie Mikro spigelt reng d'Meenung vu sengem Auteur erëm.

An der Mediathéik:

Fräie Mikro / / Frank Wies
Lauschteren

Méi zum Thema

RER Jugendschutz
Riicht Eraus

D'Jugendschutzgesetz misst méi contraignant Mesurë fir Eltere virgesinn, seet d'Affekotin Valérie Dupong a Riicht eraus zum Thema Jugendschutz. E Jugendstrofgesetz wier net déi richteg Léisung.

Felix Braz
Mannerjäreger am Erwuesseneprisong

De Justizminister Félix Braz gëtt zou, datt d'Infrastrukturen zu Schraasseg net optimal sinn. Mam neie Jugendschutzgesetz solle Mannerjäreger nëmmen nach an Ausnamefäll op Schraasseg kommen.

Handschellen
Jugendschutz

Dräi Jonker ënnert 18 Joer souzen de leschte Freideg am Prisong. Dat huet de Justizministère op eis Nofro hi confirméiert. An der Sécherheetsunitéit fir Mannerjäreger si momentan fënnef Plaze beluecht.

Jutta Gansemer
Soziales

D'Jutta Gansemer regrettéiert déi laang Waardezäite fir eng therapeutesch Begleedung fir Familljen. Bei der Reform vu Jugendschutzgesetz ka si sech eng Aféierung vun engem Jugendstrofrecht virstellen.

D'UNISEC zu Dräibur
Centre socio-éducatif

Véier Jugendlecher sinn aktuell an der zouener Sécherheetsunitéit zu Dräibur. D'Zil ass et, datt keng Mannerjäreg am Prisong fir Erwuessener agespaart ginn. Et ginn awer keng fest Critèrë fir e Placement.

Myriam Mersch-Zimmer
Jugendschutz

E feelt un Urgencëplaze fir Jonker a Schwieregkeeten ze betreien, seet d'Directrice vun der "Fondation Maison de la porte ouverte". Si fuerdert eng besser Gesetzgebung fir de Schutz vu Mannerjäregen.

Programm

Dossieren

  • Leipziger Buchmesse 2019

    D'Valerija Berdi an de Michel Delage waren dëst Joer fir de radio 100,7 op der Leipziger Buchmesse. All hier Artikelen a Bäitrag zum Thema fannt Dir hei.

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • Offre d'emploi: 1 journaliste (m/f)

    L'Établissement de Radiodiffusion Socioculturelle, opérateur de la radio de service public radio 100,7, recherche pour ses rédactions un(e) journaliste

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen