Et wier fir den Alex Bodry manner eng Fro vun Ausernanersetzungen tëscht de Parteien, mä éischter eng Fro vun Expertis, déi d'Chamber sech an der politescher Konfrontatioun vis à vis vun der Regierung wéilt ginn.
Fir dat ze änneren, bräicht een e fulltime Parlament mat Deputéierten an Experten, déi sech an Dossiere kenne spezialiséieren, seet den LSAP-Fraktiounschef, Alex Bodry. Duebelmandater missten och ofgeschaaft ginn. Et wier och net gutt, datt verschidde Gesetzprojeten an zwou Chamberkommissiounssëtzungen géifen thematiséiert ginn, an datt d'Amendementer dono vu Regierungsbeamten ausgeschafft ginn.
Et wier keng positiv Entwécklung, datt d'Debatten an de Chamberkommissiounen haaptsächlech op d'Avise vum Staatsrot géife baséieren. D'Chamber dierft sech net eleng op d'Avise vum Staatsrot verloossen. D'Parlament misst méi staark ginn an de Courage hunn, fir d'Regierungsprojeten, duerch en eegenen Input ze beräicheren. Deen Ament kéint d'Chamber selwer Initiativen ergräifen, seet den LSAP-Fraktiounschef.
Den DP-Fraktiounspresident Eugène Berger dogéint ass der Meenung, datt d'Gesetzprojeten no engem Accord tëscht de Koalitiounspartner op den Instanzewee geschéckt ginn. D'Chamberkommissioune géife sech primär op eventuell juristesch Problemer konzentréieren, déi misste geléist ginn, mengt den Eugène Berger.
Den CSV-Deputéierte Michel Wolter hat an der Emissioun Riicht eraus gesot, datt hien an de leschte Joren d'Loscht un der Chamber e bësse verluer hätt, well kee politeschen Debat méi stattfënnt. Déi Kritik gëtt vun der grénger Fraktiounscheffin Viviane Loschetter verworf. D'Regierung géif dacks d'Chamber consultéieren, iwwert Debatten zu villen Dossieren. Wann ee sech géint den Debat géing spären, da wier dat d'CSV. D'Viviane Loschetter vermësst iwwerdeems och dacks konkret Virschléi vun der CSV.
