Chamberwahlen 2018 Wat si gesond Staatsfinanzen?

Bal 13 Milliarden Euro Staatsschold, e cumuléierten Defizit beim Zentralstaat vun 900 Milliounen Euro fir d'Joren 2014-2017. En Iwwerschoss beim Gesamtstaat vun 0,6 Prozent a Wuesstemsprevisioune fir 2018 vu 4 Prozent vum PIB.

Mick Entringer / cz

Faf-Kartheiser-Gramegna
Fernand Kartheiser a Pierre Gramegna

Fir de Fernand Kartheiser vun der ADR sinn dat keng gesond Staatsfinanzen. Et géif op Käschte vun den nächste Generatioune gelieft ginn, Prioritéit misst awer sinn, fir d'Staatsschold zréckzebezuelen, esou den ADR Deputéierten. De Pierre Gramegna huet ënnerstrach, datt d'Scholdeprogressioun ënner dëser Regierung zeréckgefuer gouf, an datt geziilt héich Investitioune fir d'Zukunft gemaach goufen. Zéng Milliarden Euro a fënnef Joer, dovunner wieren 80 Prozent iwwer lafend Recettë finanzéiert ginn. Dat wiere gutt Staatsfinanzen, seet den DP-Finanzminister.

D'lafend Käschte par Rapport zum Räichtum wiere stabel, seet de Pierre Gramegna. "Dat heescht, si sinn net méi séier geklommen, wéi eise Räichtum." Lëtzebuerg wier am OECD-Verglach relativ wäit vir. "Dat beweist, datt mir eng gesond a raisonnabel Finanzpolitik hunn", seet de Pierre Gramegna.

De Conseil supérieur des finances publiques - grad wéi d'Oppositiounsparteien an der Chamber - géifen an der aktueller Lëtzebuerger Budgetspolitik méiglech Risiken erkennen, äntwert de Fernand Kartheiser. De Fonds intergénérationel wier am Fong geholl eng gutt Iddi, seet den ADR-Deputéierten, "allerdéngs, esou wéi e fonctionnéiert, kann et net sinn, datt mir mat Scholden, de jonke Generatiounen dono eng Milliard wëlle ginn, déi mat Scholde finanzéiert ass."

Esouwuel ADR wéi DP si géint nei Steieren a géint Steiererhéijungen a fir méi niddereg Betribssteieren.

Fernand Kartheiser: "Feelinvestitiounen" vermeiden

Dem Fernand Kartheiser no wieren och Feelinvestitioune gemaach ginn. Den Tram wier nëmmen ee Beispill dovun. D'ADR hätt ëmmer gefuerdert, datt de Schinnereseau vun der CFL ënner der Stad erduerch féiere misst. "Elo baue mir mam Tram en zweete Schinnereseau, wat en enorme Käschtepunkt ass an och de Verkéiersproblem net léisst. Dat heescht, mir si schonn der Meenung, datt mir d'Investitioune sollen anstänneg steieren, andeem datt mir de Wuesstem mussen an de Grëff kréien, an doduerch datt mir Feelinvestitioune verhënneren", seet de Fernand Kartheiser.

Pierre Gramegna: Investitiounen an Zukunft sënnvoll a wichteg

Dat wëllt de Pierre Gramegna net esou stoe loossen. Et wier net richteg, fir manner Investitiounen ze fuerderen. "Virdrun huet den Här Kartheiser gesot, datt mir un d'Kanner denke mussen an un de Futur. D'Investissementer an d'Educatioun an d'Schoulen, an d'Stroossen an an d'Mobilitéit, dat ass natierlech fir eis Kanner. Also dës Regierung preparéiert d'Zukunft."

D'Grënnung vum Fonds intergénérationnel géif dëse Wëlle vun der aktueller Regierung ënnerstëtzen. "Besser kann een et net maachen, wann een déi nächst Generatiounen am Sënn huet."

Elteregeld oder Accent op Congé parental?

D'ADR wëllt an hirem Wahlprogramm e sougenannten Elteregeld aféieren, dat d'Chèques servicen ersetze soll. Doduerch kéinten a Crèchen "eng ganz Rei Plazen" gespuert ginn. D'ADR wéilt net op de selwechte Wee wéi d'DP goen, fir d'Contributiounen an den EU-Budget vun 300 op 500 Milliounen Euro eropzesetzen.

D'Elteregeld géif, dem DP Finanzminister no, weisen, datt souwuel an der ADR wéi och an der CSV "de Wëllen do ass, den ale Modell, wéi en zu Lëtzebuerg an a ganz Europa war, ze fërderen". D'DP géif den Accent op de Congé parental leeën, fir datt d'Leit sech nees op hir Aarbecht konzentréiere kéinten.

An der Mediathéik:

Chamberwahlen 2018 / /
Lauschteren

Méi zum Thema

Pierre Gramegna
Italien

Déi politesch Kris an Italien suergt fir Problemer op de Finanzmarchéen. Op der Bourse zu Mailand hunn d'Aktie vu Banken u Wäert verluer. De Lëtzebuerger Finanzminister gesäit momentan awer keng Risike fir d'Eurozon.

Fernand Kartheiser
Chamberwahlen 2018

Sprooch an d'Zukunft vum Land wiere wichteg Thematike fir Lëtzebuerg, seet de Fernand Kartheiser. Bei dëse Wahlen géifen dës Sujete méi am Zentrum vun der ëffentlecher Opmierksamkeet stoen.

Pierre Gramegna
Steierpolitik

D'Stock Options gi fir den Ament net reforméiert an och net iwwer Gesetz geregelt. Obwuel de Finanzminister dat annoncéiert hat. D'Majoritéitsparteie positionéiere sech ënnerschiddlech zu dësem Revirement.

The Wolf of Wall Street
Steierpolitik

Breede Konsens an der Chamber iwwert déi geplangte Reform vun de Stock options. Mat deem Steieravantage, vun deem bestëmmte Betriber a Salariéë profitéieren, verzicht de Staat op Millioune Recetten.

Programm

Praktesch Infoen

  • 3.6. Generatiounen

    3.6. Generatiounen

    Manner Kalorien, Orchester an Danzmusek mam René de Bernardi an "The Sound of Music"

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen