Radioen

On air

De Weekend  |  Whitney - Kansas

play_arrow Live
arrow_back_ios

100komma7.lu

100komma7.lu

/ Wéi wunnt eng ukrainesch Famill bei hirer Acceuilsfamill?

Flüchtlingen aus der Ukrain

Wéi wunnt eng ukrainesch Famill bei hirer Acceuilsfamill?

Zanter dem Ufank vum Krich si ronn aacht Millioune Leit aus der Ukrain geflücht. Iwwer 5.000 Ukrainer sinn op Lëtzebuerg komm, wou si entweder a Strukturen opgeholl gi sinn, oder bei private Famillen doheem. Mir hunn eng ukrainesch Famill getraff, déi zanter Mee bei Lëtzebuerger doheem wunnt.

auto_stories

3 min

Iwwer Ungarn, Polen an Däitschland ass d'Sasha mat hirer Mamm an hiren dräi Kanner op Lëtzebuerg komm. Et war keen einfache Wee, wéi déi 32 Joer al Ukrainerin zielt:

"From Berlin, I took the kids by myself. We took the train and we had five changes. I was with a small baby because my youngest one could not walk at that time. So it was baby, bag, and the other two kids. And for me it was very stressful."

Lëtzebuerg hu si net zoufälleg als Zil rausgesicht. Ee Kolleeg aus hirem Heemechtsduerf bei Kiew, de schonn zanter siwe Joer zu Lëtzebuerg wunnt a schafft, hat hir proposéiert, op Lëtzebuerg ze kommen.

Keen einfache Schrëtt fir béid Säiten

Hei ukomm konnt d'Famill an deenen éischte Méint an enger Wunneng bleiwen, éier si du vun enger lëtzebuergescher Famill opgeholl gi sinn.

Fir béid Säite war et keen einfache Schrëtt, fir mat Onbekannten zesummen ze wunnen. Mee déi zwou Familljen hu sech vun Ufank u gutt verstanen:

"I think that I am a lucky one. In our case, it was all smooth and everything was just great. In my case, thank you very much for everything. I am really appreciative to our host family, to Tessy. She is just an amazing person and we are really lucky that we met her."

Och d'Accueilsfamill bereit d'Entscheedung net, datt si ukrainesch Flüchtlinge bei sech opgeholl huet. Si hate sech zimmlech séier bei der Croix-Rouge gemellt, nodeem déi Leit gesicht hunn, fir Flüchtlingen opzehuelen, verzielt d'Tessy:

"Mir hunn d'Plaz an och d'Zäit fir sech bëssen ëm d'Leit ze këmmeren am Ufank an hinnen ze hëllefen. Bon, dat huet dunn awer eng ganz Zäit gedauert. Si waren natierlech iwwerfuerdert am Ufank. Du sinn ech an een Interview geruff gi bei si, hunn een Dossier agereecht, an no puer Méint war et du souwäit. An dono ass et op ee Mol schnell gaangen."

Kanner léiere Lëtzebuergesch duerch Accueilsfamill

Der Sascha hir Kanner si sechs, véier an annerhalleft Joer al. Duerch de Kontakt mat der Accueilsfamill léiere si Lëtzebuergesch.

Deen Eelste koum am September an d'éischt Schouljoer a géif sech gutt debrouilléieren, esou d'Sasha. Am Ufank wier et schwéier fir si gewiescht, mee elo géif ee schonn ee Fortschrëtt gesinn, och mat der Sprooch:

"They usually don't talk with me in Luxembourgish, but I hear that they talk with our host in Luxembourgish. And also the teachers tell that they speak already well. They can explain what they want and understand everything."

D'Sasha selwer schwätzt nach keng vun de Landessproochen. Nodeem si am Hierscht eng Aarbecht fonnt huet, ass och lo keng Zäit méi do fir Sproochecoursen ze huelen.

Als Sekretärin bei der LUkrain ASBL weess si awer och, datt déi mannst Leit esouvill Chance hu wéi hier Famill. Vill Leit hätte Problemer vu finanzieller oder psychologescher Natur, seet d'Sasha.

Gemëschte Gefiller iwwer d'Chrëschtdeeg

Iwwerdeem huet d'Chrëschtdagszäit d'Sasha traureg gemaach, well de Krich an hirem Heemechtsland nach ëmmer net eriwwer ass. Mee zur gläicher Zäit hätt si sech awer och wéi an engem Märche gefillt, well an der Chrëschtzäit alles esou schéin dekoréiert wier, an do hätt een natierlech eng gewëss Magie verspuert.

Fir d'Feierdeeg koum der Sasha hire Mann aus der Ukrain op Lëtzebuerg, dat war och eng grouss Freed fir si an déi dräi Kanner.

Wann de Krich eriwwer ass, wëllt d'Sasha nees zeréck an d'Ukrain goen. D'Erfarungen, déi si hei zu Lëtzebuerg gemaach huet, sollen dann dobäi hëllefen, hiert Land nees opzebauen.