Affär Traversini Zukünfteg Déifferdenger Buergermeeschtesch wëllt sech momentan "net äusseren"

Den Dossier Traversini géif am Moment beim Parquet leien, esou d'Christiane Brassel-Rausch. Si wéilt Froen, déi nach ronderëm hire Virgänger opstinn, awer sou séier wéi méiglech beäntweren.

Rick Mertens / fk

Christiane Brassel-Rausch
Christiane Brassel-Rausch

Et wier een am Gaang dat an der Gemeng ze klären, esou déi zukünfteg nei Déifferdenger Buergermeeschtesch. An zwar "no alle Säiten hin". De Schäfferot hätt der Oppositioun gesot, "wa mir d'Äntwerten hunn, da kréie si se matgedeelt. Mee am Moment hu mir einfach och nach Froen."

D'Oppositioun zu Déifferdeng wëllt ënner anerem wëssen, ob et och Irregularitéite bei den Aarbechten un der Strooss gouf, déi bei dem Roberto Traversini säin Haus mam Gaardenhaischen féiert.

"An d'kaalt Waasser gesprongen"

De Roberto Traversini ass an der Suite vun der Affär ronderëm d'Gaardenhaischen vu senge politesche Mandater zeréckgetrueden. Als nei Buergermeeschtesch kéim elo op si eng grouss berufflech Ëmstellung duer. D'Christiane Brassel-Rausch spillt zanter méi wéi 30 Joer Theater. Dat wier op eng Manéier genee sou eng "opreiwend Aarbecht wéi Politik".

"Mäin Zil war ni an der Politik an der éischter Rei ze stoen. Bon, elo stinn ech do. Elo muss ech domadder eens ginn. A wéi ech dat elo maachen, dat wäert dann d'Zukunft weisen. Ech selwer weess et net. Ech sinn an d'kaalt Waasser gesprongen."

Dat wier ee jo am Theater gewinnt, esou nach d'Christiane Brassel-Rausch. Dat géif hir vläicht och "déi gewëssen Zouversiicht - vläicht soen d'Leit och Naivitéit - ginn, fir d'Saach unzegoen". Si seet allerdéngs, datt si d'Schauspillerei géif opginn, wann déi Projeten, déi den Ament nach am Gaang sinn, eriwwer sinn.

"Well et ganz einfach zwee intensiv Ganzzäit-Beruffer sinn, déi schwéier mateneen auszeféiere sinn. Ausser ech géif mech engem extremen Zäit - an ënnerlechem - Drock aussetzen. Dozou sinn ech net bereet. Dofir eng kloer Decisioun: Ech maachen dat elo esou laang bis déi nächst Kommunalwahlen sinn."

Kleng Projeten, wéi Liesungen, géif si awer och an Zukunft nach wëlle maachen, esou nach déi zukünfteg Déifferdenger Buergermeeschtesch.

An der Mediathéik:

Invité vum Dag / / radio 100,7
Lauschteren

Méi zum Thema

De Roberto Traversini beim Gaardenhäisschen
Immobiliëskandal

De Parquet enquêtéiert géint de Roberto Traversini a géint Onbekannt, ënner anerem wéinst "Detournement de deniers publics". De Roberto Traversini hat de de Freideg de Moie seng Demissioun als Déifferdenger Buergermeeschter a Gemengerot ginn.

Jean-Claude Franck Analys
Politesche Wocheréckbléck

D'Deeg vum Roberto Traversini als Déifferdenger Buergermeeschter schénge gezielt ze sinn. An de leschten Deeg huet hie vill Feeler missten agestoen. Fir 11 Auer huet hien eng Pressekonferenz aberuff.

Programm

Net verpassen

  • Suicidegefor am Alter: En Tabuthema

    Suicidegefor am Alter

    Persounen iwwer 75 Joer si besonnesch ufälleg fir sech d'Liewen ze huelen. Eng rezent Campagne fir "Suicidepreventioun am Alter" weist, datt Seniore sech dräi bis véier Mol méi dacks suicidéiere wéi Jonker ënner 25 Joer. E puer vun de Grënn si sozial Isolatioun, Solitude oder Depressiounen.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen