Mat enger Live-Schaltung iwwer Skype mat der tierkescher Schrëftstellerin Asli Erdoğan, enger Symbolfigur fir d'Recht op Meenungsfräiheet, gouf den Optakt vun der "Leipziger Buchmesse" gefeiert. Eng ganz Rei tierkesch Schrëftsteller a Schrëftstellerinnen, sou wéi Journalisten a Journalistinne waren op Leipzig invitéiert ginn, konnten awer dëser Aluedung net nokommen, well se keng Erlaabnis haten, d'Tierkei ze verloossen.
A senger Ried zu der Ouverture vun der Buchmesse huet den Alexander Skipis, Direkter vum "Börsenverein des Deutschen Buchhandels", dunn och d'Bundesregierung opgefuerdert, sech fir d'Fräiloossung vum Deniz Yücel anzesetzen. De Journalist vun Die Welt ass zënter Ënn Februar an der Tierkei inhaftéiert.
Protest géint Riets
Um Sonndeg hu sech eng 100 Leit spontan zesummefonnt, fir géint d'Präsenz vum rietspopulistesche Compact-Verlag ze demonstréieren an de franséische Schrëftsteller Mathias Énard gouf mam Leipziger Buchpreis zur europäischen Verständigung ausgezeechent.
Mat sengem Roman "Boussole" géif de Mathias Énard an enger Zäit vun der Spléckung an Haass als eenzegaartege Vermëttler optrieden. Als e passionéierten Orientfuerscher géif hie sech duerch e frappante Räichtum u Wëssen a seng literaresch Kraaft vun der Sprooch auszeechnen.
Europa erhalen
Liesen, nolauschteren, matenee schwätzen: dat war de Motto vun der Leipziger Buchmesse an d'Organisateuren hu bewisen, datt et keng eidel Wieder waren. Et gouf vill ze soen iwwert e Kontinent, dee mat all senge Feeler, Problemer a Suergen, eng wonnerbar Plaz ass, fir ze liewen. Et wier derwäert, Mëssstänn ze thematiséieren a sech fir d'Erhale vun de Fräiheeten, déi mer hei genéissen, anzesetzen.
Leipzig huet gewisen, datt en Zesummeliewen a Verstoen och tëschent Mënschen, déi et net ëmmer einfach mateneen haten, méiglech a gewollt ass. Datt Mënschlechkeet a Gemeinsamkeeten iwwer den Ambitioune vu verschiddenen europäesche Politiker stinn. Datt et derwäert ass, net just ze diskutéieren, mee och dat Friemt kennenzeléieren.
A Lëtzebuerg?
Dat europäescht Netzwierk fir Literatur a Bicher Traduki huet mat der Iwwerschrëft "Die Alchemie des Balkans" en Abléck an déi südosteuropäesch Realitéit a Literatur erméiglecht an "Wir in Europa -Wofür wollen wir einstehen?" war de Motto vun den Diskussiounen, déi am Denkraum Europa 21 gefouert goufen. Dëst erënnert un e Slogan, deen engem well permanent an d'A stécht: Luxembourg - Let's make it happen.
Just de blo-rouden X, deen d'Oppenheet, Gemeinsamkeet an den Austausch symboliséiere soll, war zu Leipzig néierens ze fannen. Lëtzebuerg hat kee Stand, et gouf keng Literatur z'entdecken a keng Meenung ze héieren.
Keng Reklamm
Tjo, Literatur aus ganz Europa ... aus ganz Europa? Neen, ee kleng Land ass net vertrueden, huet der Welt anscheinend näischt ze soen an näischt ze bidden. Lëtzebuerg huet keen Interessi matzediskutéieren, seng Kultur ze presentéieren, seng Literatur matzedeelen.
"Wenn die Sonne der Kultur niedrig steht, werfen auch Zwerge lange Schatten", hat de Karl Kraus gemengt. Ass et well d'Sonn vun eiser Kultur esou héich steet, datt mir guer kee Schied maachen? Ob alle Fall huet de Lëtzebuerger Literaturbetrib erëm eng Kéier bewisen, datt et net duer geet, mat dichtege Sloganen ze blénken ... well dovunner kéint ee blann ginn, fir di substanziell Sujeten.