Wann een aner Parametere kuckt, wieren d’Fraen ëmmer nach benodeelegt. Beim Joresakommes zum Beispill, oder iwwerall do wou op Evaluatioun bezuelt gëtt, sou d’Michelle Cloos. D‘Gewerkschaftlerin nennt de Finanz- an Déngschtleeschtungssecteur a Betriber an deenen et kee Kollektivvertrag gëtt.
„Do gëtt et net déi Transparenz. An do muss jiddereen individuell verhandele goen a fir Geld froen. An do huet een net automatesch Garantien. An do wësse mer, datt Frae méi schlecht ewechkommen.“
Michelle Cloos: D'Recht op Ofdreiwung sou staark wéi méiglech verankeren
Haut um Internationalen Dag vun der Fra ënnerschreift den Emmanuel Macron d’Gesetz, duerch dat d’Recht op Ofdreiwung an der franséischer Verfassung verankert gëtt. Zil dovun ass jo eng Sécherheet ze schafen, datt dat Recht net esou einfach a Fro gestallt ka ginn. Sollt een en änleche Schrëtt och zu Lëtzebuerg envisagéieren?
Jo, seet d‘Michelle Cloos, et kéint ee sech haut net méi drop verloossen, datt Acquise bestoe bleiwen. An der Vergaangenheet hätt een och ëmmer erëm gesinn, datt Errungeschaften an deene Beräicher erëm a Fro gestallt ginn. Dofir wier et wichteg, dës Acquise sou staark wéi méiglech ze verankeren.
„An dat ass an enger Verfassung natierlech méi de Fall wéi an engem normale Gesetz, well dat jo eng vill méi grouss Hürd ass, fir et do nees a Fro ze stellen.“