Neophyten an Neozoe si Planzen an Déieren, déi sech no der Entdeckung vun Amerika 1492 bei eis nei agebiergert hunn.
Meeschtens goufe se duerch de Mënsch aus kommerzielle Grënn importéiert oder koumen als blann Passagéier beim Transport vun anere Wuere mat. Déi eng kommen no der Rees manner gutt, déi aner besser kloer a verbreede sech dann.
Wann dës net heemesch Aarte sech hei esou staark verbreeden, datt si eng Gefor fir déi heemesch Fauna a Flora duerstellen, da schwätze mir vun invasiven Aarten. Ee Beispill ass de japanesche Knöterich. Muncher vun dësen invasiven Aarte, wéi de Riesenbärenklau, kënnen och fir de Mënsch geféierlech sinn.
De Wäschbier ass e Beispill aus der Déierewelt. Hien huet keen natierlechen heemesche Feind, fënnt hei alles wat e brauch fir ze iwwerliewen, ass net weider schei an zimmlech usprochslos. Allerdéngs huet en en negativen Impakt op déi heemesch Déierewelt. Hien ass e richtegen Nesträuber a frësst d’Eeër vun eisen heemeschen Aarten.
Fir eis heemesch Biodiversitéit ze schützen ass et wichteg ze vermeiden, datt dës Aarte sech weider ausbreeden an datt och keng nei importéiert ginn.
Dir kënnt eis Biodiversitéit schützen, andeems Dir fir Äre Gaart op heemesch Aarten zeréckgräift. Ënner dësem Link fannt Dir vill heemesch Alternativen zu deenen übleche problemateschen Aarten: https://environnement.public.lu/fr/publications/conserv_nature/2025/neophyte-guide/neophyte-guide.html.
Aktivitéiten zu dësem a villen aneren Theeme fannt Dir bei den Naturschutzzenteren op www.nature.lu.
