Fir datt den Datacenter ka fonctionnéieren, misst en no bei genuch Stroum- a Bandbreet-Capacitéite leien, esou de Xavier Buck. Lëtzebuerg hätt am Moment zwee Standuerter, déi dës Besoine gutt kënnen z'erfëllen: Beetebuerg a Biissen. 100,7-Informatiounen no ass en Terrain vu 25 Hektar zu Biissen déi eenzeg konkret Optioun fir den Datacenter vu Google.
"Image-méisseg ganz gutt"
Wann den Deal mat Google géif zustane kommen, da wär dat "Image-méisseg eng ganz gutt Saach" fir de Standuert Lëtzebuerg, esou de President vum ICT Cluster. "Dat ass e bësse wéi de 'Space-Mining-Effekt', do wäert d'international Press scho staark dovu schwätzen," esou de Xavier Buck. Google hätt den Image, "cool" ze sinn, an dat kéint hëllefen, fir Start-Upen aus dem IT-Beräich op Lëtzebuerg ze lackelen.
De radio 100,7 hat d'lescht Woch gemellt, datt den US-Konzern Google ronn eng Milliard zu Lëtzebuerg wëllt investéieren, fir en Datacenter ze bauen. De Xavier Buck seet, hien hätt "eigentlech léiwer gehat, déi Informatioun wär net erauskomm". Et wär net gutt, wann d'Noriichten "ze vill Drock maachen" op Google.