Corona-Pandemie "Et fänkt u sportlech ze ginn"
Stéisst den analogen Tracing u seng Limitten? Mat iwwer 60 Neiinfektiounen den Dag missten d'Leit an der Inspection sanitaire Iwwerstonne maachen, mee "mir kréien dat hin", seet de Jean-Claude Schmit, Direkter vun der Santé.
De Bäitrag vum Maurice Molitor lauschteren
Bis zu 60 Neiinfektioune kéint d'Inspection sanitaire den Dag zeréckverfollegen, sot de Jean-Claude Schmit Enn Juni am 100,7-Interview. Dës Zuel wier allerdéngs net a Stee gemeesselt, esou den Direkter vun der Santé. Och wa 60 Fäll den Dag vill wieren, géif et nach Sputt ginn. "Mat 60 fänkt et effektiv u sportlech ze ginn, da mussen d'Leit Iwwerstonne maachen."
Un deenen Deeg, wou et vill nei confirméiert Fäll gi sinn, hätt d'Personal vun der Inspection sanitaire "deels bis bal 11 Auer owes geschafft". De Jean-Claude Schmit weist sech awer optimistesch: "Mir kréien dat nach hin".
Méi Personal fir den Tracing
Den Ament schafft d'Inspection sanitaire mat engem Pool vu 60 Leit, déi probéieren erauszefannen, mat wiem nei infizéiert Persoune Kontakt haten, fir deenen dann och Bescheed ze soen. Dëse Pool gëtt de Moment opgestockt.
Et goufen Opriff gemaach, et gëtt rekrutéiert, an déi concernéiert Leit sinn och schonn no e puer Stonne Formatioun asazbereet, seet de Jean-Claude Schmit."Mir hunn och zousätzlecht Personal agestallt. Mir kënnen och nach eng Schëpp zouleeën, also ech géif soe bis 80, 100 wäerte mer et warscheinlech packen."
An de Raimlechkeeten, déi fir den Tracing reservéiert sinn, stinn 100 voll equipéiert Posten, déi noutfalls och am Schichtbetrieb kéinte besat ginn.
Eenzelfäll net méi tracen
Sollt d'Zuel vun den Neiinfektioune weider klammen, sou datt den Tracing net méi méiglech ass, huet d'Inspection sanitaire eng aner Approche, erkläert de Jean-Claude Schmit:
"Ech mengen, dann hält ee warscheinlech mat enger Rei Saachen op: Eenzelfäll ginn da warscheinlech net méi getraced, mee do wou mer wëssen, datt d'Clustere sinn, kéinte mer z.B. nach aktiv bleiwen."
An deem Fall géife sech awer nach aner Froe stellen, seet den Direkter vun der Santé: "Dee Moment ass d'Epidemie nämlech net méi ënner Kontroll" an d'Regierung misst sech Froe stelle vun deelweis méi strikte Limitatiounen, esou de Jean-Claude Schmit.
Méi zum Thema
Analys
D'Zuele klammen nees
Fir d'éischte Kéier zanter siwe Woche gouf nees e Stierffall gemellt wéinst Covid-19. Zanter Nationalfeierdag gëtt et eng zweet Well un Infektiounen. D'Zuele klammen awer net esou séier wéi am Mäerz.
Large-scale testing dréit Friichten
Bis de 6. Juli goufen am Kader vum Large-scale testing 268 Leit positiv getest. Dat si Leit, déi zum Deel guer keng Symptomer hunn, a sech net krank spieren, an doduerch fréi kënnen a Quarantän gesat ginn.
Net all positive Fall ka retracéiert ginn
D'Santé wier "e bëssen iwwerrascht" iwwer d'Rapiditéit, mat där d'Corona-Infektiounen nees geklomme sinn, esou de Jean-Claude Schmit. Pro Dag kéint een d'Kontakter vun enge 60 Leit retracéieren.
