Lëtzebuerg entdecken Duerch d'Geschicht, d'Aktualitéit besser verstoen

E groussen Deel vun der Lëtzebuerger Geschicht maachen déi zwee Weltkricher aus. Dofir gi mir haut an eiser Serie Lëtzebuerg entdecken an de Militärmusée op Dikrech. Am Fokus steet do ënner anerem déi Lëtzebuerger Arméi.

Pit Walté / cbi

Arméimusée

Eng grouss Militärmuecht war Lëtzebuerg nach ni, dofir kéint ee mengen, datt och déi Lëtzebuerger Militärgeschicht net esou interessant wier. Dat ass awer net esou, wéi de Benoît Niederkorn seet, Curateur vum Musée national d'histoire militaire zu Dikrech.

"Bei der Lëtzebuerger Arméi denkt een ëmmer un eng Arméi, déi et nach net laang gëtt. An dach huet se schonn eng grouss Militärgeschicht. Dat geet dobäi un, datt mir hire Virleefer hei duerstellen, d'Fräiwëllegen-Kompanie, déi 1881 gerënnt gouf. An natierlech och déi nei opgebauten Arméi, gegrënnt 1945 nom Krich, wéi och de Service obligatoire ageféiert gouf an 30.000 Lëtzebuerger doduerch gaange sinn."

Eng Episod an dëser Geschicht ass, datt d'Lëtzebuerger Arméi am Koreakrich gekämpft huet. Eppes wat net esou bekannt wier, seet de Benoît Niederkorn.

"De Koreakrich ass jo och schonn u sech e Krich, dee gréisstendeels an de Geschichtsbicher vergiess gouf. A genee do war Lëtzebuerg och mat vir bäi. Dat war souzesoen eng vun den éischten Auslandsmissiounen, bei deene Lëtzebuerg zwee Contingente mat jeeweils 45 Leit dohinner geschéckt huet an zwee Lëtzebuerger hiert d'Liewe gelooss hunn. Si woussten, wat eng Diktatur ass an deementspriechend wollte si fir d'koreanescht Vollek d'Fräiheet erkämpfen."

Wann ee wéi zu Dikrech d'Erënnerungen un d'Lëtzebuerger Arméi oder d'Ardennen-Offensiv lieweg hale wëllt, brauch een natierlech och vill Objeten, déi een ausstelle kann. Am Norde waren dofir Sammler ënnerwee, déi al Krichs-Utensilie gesicht hunn, mat deene si an den 80er Joren de Musée opgemaach hunn.

Nodeems de Musée gegrënnt war, an et am Land ëmmer méi bekannt gouf, datt een esou Saache sicht, koum dann ëmmer méi Material zesummen.

"An deementspriechend gesäit ee mëttlerweil, datt mir iwwer 50.000 Objeten hunn. Et hält net op, datt nach Saachen erakommen an dat gesäit ee gutt an eisen Depoten, déi aus allen Néit platzen."

D'Erënnerung, och u schwéier Zäite lieweg ze halen, dat ass een Optrag, deen de Militärmusée huet. Mee et ass net nëmmen dee geschichtlechen, mee och e pädagogeschen.

"D'Enn vum Krich ass elo 75 Joer hier, dat heescht et ginn och ëmmer manner Zäitzeien, déi dat nach kënnen hiren Enkelen an Urenkele vermëttelen. Dee Moment kennt dëse Rôle dem Musée zou. Mir maachen immens vill Visite guidéë mat Klassen. Mir hunn an de leschten zwee Joer eise ganze Programm iwwerschafft gehat, mir hunn interaktiv Aktivitéiten an deenen d'Schoulklasse sech selwer d'Saachen erschaffe mussen."

An et wier och esou, datt een duerch dat, wat een am Musée gesäit, d'Aktualitéit besser anuerdne kéint, seet de Benoît Niederkorn. Datt een einfach gesäit, datt et esou Krisesituatiounen och schonn hei am Land gouf.

"Syrien zum Beispill, Flüchtlingen, si Saachen, déi een iwwerall erlieft. A mir kënnen hinnen hei vermëttelen, datt et nach net laang hier ass, datt viru 75 Joer, wéi d'Ardennenoffensiv ausgebrach ass, iwwer Dausende vu Leit aus dem Norde geflücht sinn. An herno och alles zerstéiert war, wéi am Irak oder Afghanistan."

Zanterdeem datt de Militärmusée duerch en Ubau méi grouss gouf, ass och Plaz fir Sonnerausstellungen ze organiséieren. De Moment ass et "Doughboys zu Lëtzebuerg. The First Liberation 1918", bei där et ëm d'Befreiung vu Lëtzebuerg nom Éischte Weltkrich geet, eppes wat e bëssen a Vergiess geroden ass. Dobäi steet am Fokus, wéi e kulturellen Afloss déi Zäit hat.

An der Mediathéik:

Lëtzebuerg entdecken / / Pit Walté
Lauschteren

Méi zum Thema

Robbesscheier zu Munzen 2
Lëtzebuerg entdecken

"D'Natur mat alle Sënner erliewen", dat ass de Motto vun der Robbesscheier zu Munzen. Et ginn divers Handwierker virgestallt, et gëtt eng grouss Offer un Teambuilding-Moossnamen an d'Déiere stinn am Mëttelpunkt.

Héijuewe Belval 2
Lëtzebuerg entdecken

Um Belval kann een eng Visite vum Héichuewen A maachen, fir méi iwwer d'Stolindustrie gewuer ze ginn. Wann een dann um Héichuewen ass, huet een e gudde Bléck doriwwer, wéi sech de Site entwéckelt huet a wat haut do wichteg ass.

Abtei Neimënster Gronn
Lëtzebuerg entdecken

An eiser Summer-Serie "Lëtzebuerg entdecken" geet et an d'Stad. Et geet ëm verschidde Weeër, déi een do goe kann, fir d'Geschicht vu Lëtzebuerg ze entdecken. De Pit Walté huet sech puer schéin Ecke weise gelooss.

Camping Officiel Echternach
Lëtzebuerg entdecken

Hu Dir schonn emol vun der Kleopatra-Nol an der Däiwelsschoart héieren? Et ass ee vun de spektakuläersten Naturspektakelen an der Lëtzebuerger Schwäiz, direkt hanner dem Iechternacher Camping.

Programm

  • Notturno

  • On air

    Notturno

  • Virum Dag

  • Moies-Magazin

  • Iwwer Mëtteg

Dossieren

  • 76. Filmfestival zu Venedeg

    Zu Venedeg ass déi 76. Editioun vum Filmfestival. Den Tom Dockal ass fir de radio 100,7 op der Plaz. All Dag pickt hie sech ee Film eraus, fir deen da méi genee ënner d'Lupp ze huelen.

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen