Buch-Tipp fir de Summer Allain Glykos - Gilets de sauvetage

Zynismus ass d'Schwammwest vum Verstand, heescht et. Eventuell erkläert dat, firwat den Allain Glykos den Ufank vu senger Rees op déi griichesch Insel Chios mat enger gudder Portioun Sarkasmus beschreift: Op sengen zwee Vollen erkläre Stewardesse virum Decollage de Fonctionnement vun de Schwammwesten. "Personne ne regarde, personne n'écoute", sou dem Auteur seng Observatioun. 2015 sinn a Griicheland all Mount e puer Dausend Flüchtlingen u Land gaangen. An hiert Liewen houng tatsächlech net um spréchwiertleche Fuedem aus Seid, mee un der Kordel vum Gilet de sauvetage. Dowéinst den Titel.

Den Allain Glykos wëllt sech awer guer net iwwer déi lëschteg Touristen op sengem Vol stellen. Hien a seng Fra hunn zesumme 700 Euro fir den Aller-retour-Billjee bezuelt an hunn déi 3.500 km an engem hallwen Dag relax gepackt. "Nous étions heureux de partir", gëtt hien zou, an zwar net zynesch. Zynismus kënnt iwwregens vum griicheschen Terme "Hond", mee éischter resignéiert.

Eng psychologesch Belaaschtung

No e puer faarwege Säiten "Gilets de sauvetage" ass kloer, datt mir an der Suite net e Fransous - mat griicheschen Originnen - a Griichenland dobäi erliewen, wéi hien de Griichen hir Ekonomie, an de Refugiéen hiert Liewe rett, Grafic Novel reimt net onbedéngt op Superherofilm. Den Allain Glykos reest mat méi Bagage wéi just 20 Kilo. Säin eegene Papp, deen 2015 100. Gebuertsdag gefeiert hätt, war mat siwe Joer gezwongen, vu Smyrne ze flüchten, wat virun 1922 griichesch awer duerno tierkesch war.

No senger Odyssee ass hie spéider a Frankräich ausgewandert, op der Sich no engem bessere Liewen. Esou en Ierwen ass fir déi zweet Generatioun nawell och eng zimlech psychologesch Belaaschtung. Wat dem Allain Glykos seng Fra am Buch natierlech net komplett novollzéie kann. Mee och d'Griichen op Chios, virop d'Hotel-Proprietäre Maria an Niko, doriwwer eraus déi eeler Leit, déi quasi verloossen an alen Dierfer sëtzen, hu kee Versteesdemech dofir, datt den Allain a seng Fra, esoubal d'Sonn ënnergeet, op hirer Hotelsterrass a Richtung Mier stuerken, un d'Côte lafen, wa Booter opdauchen a mathëllefen, datt d'Flüchtlinge sécher um Festland ukommen.

"Les îles les plus à l'est leur offrent quelques heures de répit dans leur longue marche. Chaque île est un point de fuite pour qui, chez lui, n'a plus de perspectives. Installés dans la torpeur de l'été, que ferons-nous pour eux ?"

Déi ënnerschiddlechst stilistesch Mëttel

Fir "Gilets de sauvetage" huet net just den Auteur Allain Glykos zu den ënnerschiddlechste stilistesche Mëttele gegraff. Och den Illustrator Antonin Dubuisson zitt eng Hellewull BD-Registeren. D'Spill mat der Typografie, der Perspektiv; historesch Faite sinn anescht gezeechent, wéi perséinlech Erliefnesser a Gedanken.

Wat verbënnt dann elo déi zwee Männer, déi fir d'éischt emol en Altersënnerscheed vu 40 Joer trennt? Den Antonin hat vu senger Groussmamm e Carnet de voyage vum Urgrousspapp geierft. Doranner huet dee säi bizaren Alldag als franséischen Occupant an der Tierkei kuerz nom Éischte Weltkrich, deen hien als Poilu matgemaach hat, festgehalen. Den Illustrator wousst, datt hien onbedéngt eppes mam Carnet maache wéilt, huet awer no enger Persoun gesicht, déi sech mat der Geschicht vun der Zäit auskenne géif. Bekannten hunn him den Allain Glykos uginn. "Gilets de sauvetage" ass hir zweet erfollegräich Kollaboratioun. Mol gespaant, wéi an ob et weidergeet, respektiv - fléisst.